Նախարար. Հայաստանը 3 հորիզոնականով բարելավել է դիրքերը Գլոբալ ստարտափ էկոհամակարգի ինդեքսում

Արմինֆո.  Հայաստանը վերջին մեկ տարում 3 հորիզոնականով բարելավել է դիրքերը Գլոբալ ստարտափ էկոհամակարգի ինդեքսում՝զբաղեցնելով 54-րդ տեղը: Այդ մասին Facebook-ի իր էջում գրել է ՀՀ բարձր տեխնոլոգիական արդյունաբերության նախարար Մխիթար Հայրապետյանը:

«StartupBlink-ի Global Startup Ecosystem Index-ը համաշխարհային վարկանիշային համակարգ է, որն ամեն տարի ներկայացնում է աշխարհի 100 երկրների և 1000 քաղաքների ստարտափ էկոհամակարգերի վիճակը։ Այս վարկանիշը ստեղծվում է բազմաթիվ տվյալների վրա հիմնվելով՝ հաշվի առնելով ստարտափների քանակը, որակը և բիզնես միջավայրի պայմանները։

Զեկույցում անդրադարձ է կատարվել մի քանի կարևոր գործոնների, այդ թվում՝ ՀՀ կառավարության կողմից իրականացվող ծրագրերին, որոնց նպատակն է աջակցել երկրում տեխնոլոգիական ստարտափներին, մասնավորապես, հարկային խթաններ և թիրախային ներդրումներ բարձր տեխնոլոգիական ոլորտներում՝ նշելով, որ այդ ներդրումները հիմնականում ուղղորդվում են ՀՀ բարձր տեխնոլոգիական արդյունաբերության նախարարության միջոցով, որն ակտիվ դեր է խաղում նորարարության խթանման և թվային տնտեսության ենթակառուցվածքների աջակցման գործում», - ընդգծել է Մխիթար Հայրապետյանը :

Նշենք, որ զեկույցի համաձայն, անցած տարվա ընթացքում Հայաստանը ՏՏ ոլորտի 22,8 տոկոս աճ է գրանցել: Այն զբաղեցնում է 1-ին տեղը Կենտրոնական Ասիայում և մտնում է ծրագրային ապահովման և տվյալների համաշխարհային առաջատարների թոփ 35-ի մեջ: Ինչպես նշում են զեկույցը կազմողները, Երևանը բարձրացել է 19 հորիզոնականով և այժմ զբաղեցնում է 181-րդ տեղն աշխարհում, ինչը տարածաշրջանում ամենաարագ աճն է:

Վարկանիշում ընդգծվում է, որ երկրի էկոհամակարգը զարգանում է պետական և մասնավոր հատվածների սիներգիայի շնորհիվ ։ Հայաստանը 2 պաշտոնական "միաեղջյուրների"՝ Picsart и ServiceTitan տունն է։ Աշխարհի խոշոր տեխնոլոգիական ընկերությունները, ինչպիսիք են NVIDIA-ն, Synopsys-ը և AMD-ն, ունեն երկրում հետազոտությունների և զարգացման խոշոր կենտրոններ: Երկրում գործում է հասուն էկոհամակարգ՝ բիզնես- հրեշտակների 4 ակտիվ ցանցերով և 5 վաղ փուլի վենչուրային հիմնադրամներով: