Արմինֆո. Հաշվի առնելով Երևանի 10 մանկապարտեզների ավագ խմբերի համար «Ռոբոտատեխնիկա» ծրագրի ներդրման ուղղությամբ Ազգային պոլիտեխնիկական համալսարանի հետ համագործակցության հաջողված փորձը՝ Երևանի քաղաքապետարանը որոշել է ընդլայնել ծրագիրը:
Ինչպես հայտարարվել է քաղաքապետարանի աշխատանքային նիստի ընթացքում, նոր ուսումնական տարում Երևանի ևս 30 մանկապարտեզ կմիանա այդ ծրագրին: Տեղի կունենա դաստիարակների վերապատրաստում Ազգային պոլիտեխնիկական համալսարանի հետ համագործակցությամբ: Բացի այդ, նախադպրոցական հաստատություններին դասերի համար կտրամադրվեն համապատասխան հավաքածուներ և պլանշետներ:
Այսպիսով, նոր ուսումնական տարվան ընդառաջ Երևանի 40 մանկապարտեզների սաներ կսովորեն ռոբոտաշինության հիմունքները: Նշվել է, որ փորձնական ծրագրի առաջին փուլի արդյունքներով վերջինիս մասնակից դաստիարակները ստացել են պարգևավճարներ ՝ աշխատավարձի 100 տոկոսի չափով:
