Հայ բեռնափոխադրողները հայտնվել են փակուղում

Արմինֆո. Հայ բեռնափոխադրողները բողոքի ակցիա են իրականացրել կառավարության շենքի մոտ՝ պահանջելով հանդիպում վարչապետ Նիկոլ Փաշինյանի հետ:

Բողոքի ակցիայի մասնակիցները դժգոհում են, որ մատնված են ճակատագրի քմահաճույքին, քանի որ իրենց խնդիրներն ու շահերն առաջնային չեն ինչպես օտար պետությունների, այնպես էլ Հայաստանի կարգավորող մարմինների ներկայացուցիչների համար։ Հայկական մեքենաները, նրանց ասելով, բեռնվում / բեռնաթափվում են վերջին հերթին, նույնիսկ, եթե դրանք փոխադրում են շուտ փչացող արտադրանք։ Բեռնափոխադրողները նշել են, որ վրացի մաքսայինները նախապատվությունը տալիս են իրենց իսկ առաքիչներին, մինչդեռ, նման մոտեցում չեն ցուցաբերում հայ մաքսայինները։ Ինչպես նրանք նշել են, նման իրավիճակ է նաև «Վերին Լարս» անցակետում։ Այսինքն, բոլոր անցակետերում հայ բեռնափոխադրողները բախվում են արհամարհանքի, այդ թվում՝ սեփական հայրենիքում։

Բացի այդ, բողոքի ակցիայի մասնակիցները հայտարարել են, որ հայկական լոգիստիկ ընկերությունները եւս նախապատվությունը տալիս են արտասահմանյան բեռնափոխադրողների հետ աշխատանքին, քան՝ տեղական բեռնափոխադրողների' վերջիններիս առաջարկած սակագների պատճառով: Նրանք ուշադրություն են հրավիրել այն հանգամանքի վրա, որ օտարերկրյա փոխադրողները մեր երկրում չեն վճարում այն լրացուցիչ հարկերը, որոնք իրենք են վճարում։ Այսպիսով, ձևավորվում են անհավասար պայմաններ: Բեռնափոխադրողները դեմ չեն հենց նույն վրացի բեռնափոխադրողների գործունեությանը, միայն պահանջում են ապահովել հավասար պայմաններ և վերահսկողություն հայ լոգիստների գործունեության նկատմամբ: Ընդ որում, նրանք անիրատեսական են համարել, որ վրացի լոգիստները աշխատեն հայ բեռնափոխադրողների հետ, այլ ոչ թե՝ իրենց, մինչդեռ, մեր երկրում դա նորմալ պրակտիկա է լոգիստիկ ընկերությունների մեծ մասի համար:

Որպես օրինակ՝ ակցիայի մասնակիցներից մեկը պատմել է. " Ուզբեկական, վրացական բեռնափոխադրողները 2.3 հազար դոլար սակագին են սահմանում, մինչդեռ, ես՝ 2.5 հազար դոլար: Հետո, եկեք հանենք տարադրամի փոխանակման ժամանակ կորուստները՝ փոխարժեքի տատանման հետևանքով, ևս 10%  վճարում եմ պետությանը, ավելացնենք մեքենայի ամորտիզացիան և այլն։ Ավելին, մեզանից պահանջում են ցույց տալ ծախսերը Հայաստանում: Իսկ ի՞նչ ծախսերի մասին կարող է խոսք լինել, եթե մեր երկրում իմ վազքը կոպիտ հաշվարկով կազմում է 500 կմ, մինչդեռ, Ռուսաստանում՝ 4 հազար կմ: Ես վառելիք եմ գնում Ռուսաստանում, և ինչպե՞ս կարող եմ ծախսը ցույց տալ այստեղ>, - հարցրել է նա:

Իրավիճակի առնչությամբ բեռնափոխադրողները խնդրում են լուծում գտնել՝ կամ իրենց նկատմամբ կիրառել հարկային արտոնյալ սակագներ, կամ վճարվող հարկից հանել երրորդ երկրում կատարված ծախսերը։

Բացի այդ, բողոքի ակցիայի մասնակիցները բարձրացրել են ազգային անվտանգությանը վերաբերող շատ նուրբ հարց։ Մասնավորապես, բեռնափոխադրողները պատմել են, որ Հայաստանի զորամասերում ապրանքներ բեռնաթափող վրացական մեքենաների վարորդները հաճախ թուրքեր են: <Այսինքն, նրանք կարող են ներս մտնել և տեսնել, թե մեզ մոտ ինչպես է ամեն ինչ աշխատում, որտեղ, ինչ: Եվ ոչ ոք չի մտածում այդ հարցերի մասին: Այդ պատճառով  էլ մենք նման իրավիճակում ենք", - դժգոհել են նրանք:

Վարորդները նաև  ժգոհել են, որ կառավարության շենքի մոտ հավաքվածները, գրեթե բոլորը, մասնավոր անձինք են, ովքեր վարկային միջոցներով մեքենաներ են ձեռք բերել, ակնկալելով, որ կկարողանան կատարել իրենց վարկային պարտավորությունները՝ պայմանավորված իրենց ծրագրած գործունեությամբ: Սակայն արդեն մոտ մեկ տարի  նրանք վնասով են աշխատում։

Այս ընթացքում տեղի են ունեցել մի շարք հանդիպումներ Տարածքային կառավարման և ենթակառուցվածքների նախարարության ներկայացուցիչների հետ, որոնք որևէ արդյունքի չեն հանգեցրել: Գրավոր հարցումները նույնպես անտեսվել են։ Այդ իսկ պատճառով այսօր բեռնափոխադրողները հավաքվել էին կառավարության շենքի մոտ՝ վարչապետի հետ հանդիպելու պահանջով։ Նրանք կառավարության ղեկավարին մինչև շաբաթվա վերջ ժամանակ են տվել՝ իրենց ընդունելու համար, հայտարարելով, որ հակառակ դեպքում կգնան ծայրահեղ քայլերի՝ կփակեն ճանապարհները, որպեսզի օտարերկրյա բեռնափոխադրողները չկարողանան մուտք գործել մեր երկիր։