Հունիսի 1-ին և դրանից հետո կատարված սոցիալական ծախսերը կփոխհատուցվեն, եթե դրանք անմիջականորեն կատարվել են հայտարարատուի կողմից

Արմինֆո. Պետական եկամուտների կոմիտեն տեղեկացնում է, որ 2025 թվականի հունիսի 1-ին և դրանից հետո սոցիալական ծախսերի դիմաց կատարված վճարումները կփոխհատուցվեն, եթե դրանք անմիջականորեն կատարվել են հայտարարատու ֆիզիկական անձի կողմից։

«Այսինքն, փոխհատուցումից կարող են օգտվել միայն այն դեպքում, երբ վճարումը հիմնավորող փաստաթղթում որպես վճարող հանդիսանա հայտարարատու ֆիզիկական անձը։ Բացառություն են կազմում դասագրքե­րի վարձակալության նպատակով կատարված ծախսերը և աշխատողից հատուցում ստանալու պայմանով գործատուի կողմից ապահովագրական փաթեթների ձեռքբերման գծով կա­տարված ծախսերը։
 

Կոմիտեն հիշեցնում է, եթե սոցիալական ծախսը փաստացի կատարել է այլ անձ, սակայն հայտարարատուի միջոցներից, ապա հայտարարատուն կարող է օգտվել փոխհատուցումից, բացառապես այն դեպքում, եթե սոցիալական ծախսերի դիմաց վճարումները կատարվել են 2024 թվականի հունվարի 1-ից մինչև 2025 թվականի հունիսի 1-ն ընկած ժամանակահատվածում», - ասվում է ՊԵԿ հաղորդագրությունում։

Հիշեցնենք, որ ՀՀ ռեզիդենտ քաղաքացիները եկամուտների հայտարարագիր ներկայացնելու միջոցով կարող են օգտվել եկամտահարկի գումարից սոցիալական ծախսերը փոխհատուցելու հնարավորությունից: Այդ հնարավորությունը տարածվում է ինչպես անձամբ հայտարարատուի, այնպես էլ ընտանիքի անդամների (ամուսնու, ծնողների և երեխաների) կատարած սոցիալական ծախսերի վրա: Ծախսերի փոխհատուցումը մեկ հաշվետու տարվա ընթացքում չի գերազանցում 100 հազար դրամը:

2025 թվականի փետրվարի 13-ին կառավարությունն ընդլայնել է ֆիզիկական անձանց եկամուտների համընդհանուր հայտարարագրման շրջանակներում փոխհատուցվող առողջապահության և կրթության սոցիալական ծախսերի շրջանակը։ Առկա ուղղություններին գումարվել են ևս երեքը. երաժշտական, արվեստի, պարի դպրոցների, դպրոցական կազմակերպությունների և կենտրոնների, մանկապատանեկան մարզական և արտադպրոցական այլ ծրագրերի, ինչպես նաև Կրթության, գիտության, մշակույթի և սպորտի նախարարության երաշխավորած ոչ ֆորմալ կրթական ծրագրերով իրականացվող ուսման վարձերը; միջին ընդհանուր և հատուկ կրթական ծրագրերի շրջանակներում դասագրքերի վարձակալության ծախսերը, ինչպես նաև 2024-2025թթ. ատամնաբուժական ծառայությունների ծախսերը: Սոցիալական բնույթի ծախսերի փոխհատուցման իրավունքը ծագում է, եթե սոցիալական բնույթի ծախսերը կատարվել են անկանխիկ եղանակով, բացառությամբ դասագրքերի վարձակալության նպատակով կատարված ծախսերի (ոչ ավելի, քան 3 հազար դրամ), որոնց համար վճարման փաստը հաշվի չի առնվում ։