Հայաստանում մոպեդները կդասեն տրանսպորտային միջոցների շարքին եւ կպարտավորեցնեն ապահովագրել

Արմինֆո.  ՀՀ կենտրոնական բանկն առաջարկում է մոպեդները ճանաչել քաղաքացիաիրավական պատասխանատվության պարտադիր ապահովագրության ենթակա տրանսպորտային միջոցներ: Դա նշանակում է, որ մոպեդների սեփականատերերը պարտավոր կլինեն ձեւակերպել ԱՊՊԱ ապահովագրագիր։ Համապատասխան նախագիծը հրապարակված է իրավական ակտերի միասնական պորտալում:

Ինչպես ասվում է փաստաթղթի հիմնավորման մեջ, վերջին տարիներին Հայաստանի Հանրապետությունում տարածում են ստացել աշխատող շարժիչ չունեցող էլեկտրամոբիլները, եւ "Ավտոտրանսպորտային միջոցների շահագործման ընթացքում առաջացող պատասխանատվության պարտադիր ապահովագրության մասին" օրենքի գործող խմբագրությունում պարտադիր ապահովագրության պահանջի տարածումը նրանց վրա միանշանակ չէ, ուստի անհրաժեշտ է համապատասխան փոփոխություն կատարել օրենքում:

<2010 թ. ընդունված օրենքի 25-րդ հոդվածը տալիս է տրանսպորտային միջոցների սպառիչ ցուցակ, որոնց շահագործման ընթացքում առաջացող պատասխանատվությունը ենթակա չէ պարտադիր ապահովագրության:

Սակայն 2010 թվականից ճանապարհային երթևեկության անվտանգության ապահովման համար պատասխանատու պետական մարմնում գրանցվող տրանսպորտային միջոցների չափորոշիչները պարբերաբար վերանայվել են (ՀՀ կառավարության 2010 թվականի սեպտեմբերի 9-ի ն 1251-Ն որոշման հավելված 1-ի ցանկ): Որոշման վերանայված ցանկով սահմանվել է, որ գրանցման ենթակա են նաև այնպիսի տրանսպորտային միջոցներ, ինչպիսիք են մոպեդները, եռացիկլները, էլեկտրական շարժիչներով տրանսպորտային միջոցները և այլն: Հաշվի առնելով վերը նշվածը, անհրաժեշտություն է առաջացել համապատասխան փոփոխություններ կատարել օրենքում>, - ասվում է փաստաթղթում:

Օրինագծով առաջարկվում է "Ավտոտրանսպորտային միջոցների շահագործումից բխող պատասխանատվության պարտադիր ապահովագրության մասին" օրենքի 3-րդ հոդվածի 1-ին մասի 4-րդ կետում մոպեդները սահմանել որպես մեխանիկական տրանսպորտային միջոցներ, իսկ օրենքի 25-րդ հոդվածի 2-րդ մասի, 1-ին կետի փոփոխությունների արդյունքում մոպեդները կդառնան նաև պարտադիր ապահովագրության ենթակա տրանսպորտային միջոցներ: