Արմինֆո. ՀՀ կառավարությունը շուրջ 6,6 մլրդ դրամ կհատկացնի 2024 թվականի մայիսի 25-26-ը Լոռու և Տավուշի մարզերում տեղի ունեցած ջրհեղեղի հետևանքով գյուղատնտեսության ոլորտում քաղաքացիների վնասների փոխհատուցմանը, որոնք տարբեր պատճառներով չեն օգտվել փոխհատուցման կարգով նախատեսված օգնությունից։
Ինչպես նշվում է փաստաթղթի պարզաբանման մեջ, Լոռու և Տավուշի մարզերում շուրջ 580 շահառու աջակցություն է ստացել բնակչությանը պատճառված վնասի հատուցման ընթացակարգի շրջանակներում, գյուղատնտեսության ոլորտում փոխհատուցման չափը կազմել է 158,8 մլն դրամ: Այսպես, Լոռու մարզից 273 շահառու ստացել է 109,8 մլն դրամի չափով փոխհատուցում, իսկ Տավուշից 307 շահառու ՝ շուրջ 49,0 մլն դրամի չափով։
Սակայն, Լոռու և Տավուշի մարզպետների աշխատակազմերի կողմից ներկայացված գրությունների համաձայն, տարերային աղետից տուժած բնակավայրերի մի շարք բնակիչներ տարբեր պատճառներով (հողերի նպատակային նշանակությանը չհամապատասխանելը, տեղեկատվության բացակայությունը և այլ տեխնիկական պատճառներ) բացառվել են և չեն օգտվել ՀՀ կառավարության 2024 թվականի օգոստոսի 15-ի թիվ 1264-Լ որոշմամբ հաստատված փոխհատուցման ընթացակարգից:
