Արմինֆո. Գյուղատնտեսական լիզինգի պետական ծրագրով 2024 թվականին տարեկան պլանը գերակատարվել է ։ Այդ մասին հաղորդել է ՀՀ էկոնոմիկայի նախարար Գևորգ Պապոյանը։
Նա պատմել է, որ մշակելով գյուղատնտեսական լիզինգի ծրագիրը, սահմանվել է տարեկան 500 միավոր գյուղատնտեսական տեխնիկայի ցուցանիշ, որը պետք է ամեն տարի մուտք գործի Հայաստան։ Սակայն 2024 թվականին ֆերմերները, օգտվելով այս պետական ծրագրից, ձեռք են բերել, ընդհանուր առմամբ, 926 միավոր գյուղատնտեսական տեխնիկա, ինչը գրեթե 2 անգամ գերազանցել է նախատեսված տարեկան ցուցանիշը։ Ս.թ. ապրիլի 1-ի դրությամբ, ինչպես նշել է Պապոյանը, գյուղացիներն արդեն ձեռք են բերել 261 միավոր գյուղտեխնիկա՝ ծրագիրը կատարելով 55 տոկոսով: Այդ առումով նախարարը վստահություն է հայտնել, որ արդեն հունիսի վերջին կհաջողվի ապահովել 500 միավորի շեմը։
Այդ ծրագրի պորտֆելը հաշվետու ամսաթվի դրությամբ կազմել է 19.6 մլրդ դրամ, որից 3.6 մլրդ դրամը պետության կողմից վճարված լիզինգի տոկոսադրույքներն են։ Պապոյանն ընդգծել է, որ ծրագիրը մեծ պահանջարկ ունի և նպաստում է արտադրողականության բարձրացմանը:
Ծրագրի գործարկման շնորհիվ Հայաստան է ներկրվել շուրջ 4-5 հազար միավոր ամերիկյան, գերմանական, կանադական, չինական արտադրության գյուղատնտեսական տեխնիկա, որը, նախարարի խոսքով, փոխել է 70-80-ական թվականների արտադրության տեխնիկան:
Հիշեցնենք, որ դեռևս 2017 թվականի հունվարի 26-ին կառավարության նիստում վարչապետի պաշտոնը զբաղեցնող Կարեն Կարապետյանը կոչ էր արել մշակել գյուղտեխնիկայի լիզինգի աջակցության ծրագիր: Գյուղատնտեսության նախարար Իգնատի Առաքելյանին հանձնարարվել է հանդիպումներ ունենալ Ռուսաստանից և այլ երկրներից գյուղատնտեսական տեխնիկա արտադրողների ներկայացուցիչների հետ ՝ մատակարարման պայմանները քննարկելու համար:
Նշենք, որ ներկայումս Հայաստանի Հանրապետությունում գյուղատնտեսական տեխնիկայի լիզինգի աջակցության ծրագրի շրջանակներում լիզինգի առարկա կարող են լինել տարբեր մակնիշի տրակտորներ, կոմբայններ, գյուղատնտեսական այլ տեխնիկա: Լիզինգի առարկաների ընդհանուր գումարը կազմում է մինչև 250 մլն դրամ: Պետության կողմից սուբսիդավորման արդյունքում տոկոսադրույքը 0% է սահմանամերձ շրջաններում սոցիալական աջակցություն ստացող ձեռնարկությունների, զինապարտության կամ զինվորական ծառայության պարտականությունները կատարելիս գործողությունների արդյունքում հաշմանդամ դարձած քաղաքացիների համար; 2%՝ մնացած բոլոր շահառուների համար: Կանխավճարը' լիզինգի առարկայի գնման գնի 20% - ի չափով:
