ԱԶԲ առաքելությունը մեկնել է Սյունիք ՝ ուսումնասիրելու "Հյուսիս-Հարավ" ՄՏՄ-ի Սիսիան-Քաջարան ճանապարհի հյուսիսային հատվածի նախագիծը

Արմինֆո.  «Ճանապարհային դեպարտամենտ» հիմնադրամի գործադիր տնօրեն Արկադի Չերչինյանն ընդունել է Ասիական զարգացման բանկի (ԱԶԲ) առաքելությանը, որը Հայաստանում է՝ քննարկելու Հյուսիս-հարավի Սիսիան-Քաջարան ճանապարհի հյուսիսային ենթահատվածի կառուցման ծրագրի նախապատրաստական աշխատանքները։

«Ճանապարհային դեպարտամենտ» հիմնադրամի հաղորդագրությունում նշվում է, որ Ասիական զարգացման բանկը 236 միլիոն եվրոյի չափով համաֆինանսավորելու է Սիսիան-Քաջարան ճանապարհի հյուսիսային ենթահատվածի շինարարությունը։ Այն ունենալու է մոտ 27կմ երկարություն՝ ներառյալ մի քանի թունելներ ու կամուրջներ։ Հյուսիսային ենթահատվածի կառուցման նպատակով վարկային համաձայնագիր է կնքվել նաև Եվրոպական ներդրումային բանկի հետ։ Այս հատվածի կառուցման համար ֆինանսական ներդրում կկատարի նաև ՀՀ կառավարությունը։

«Ճանապարհային դեպարտամենտ» հիմնադրամի գործադիր տնօրեն Արկադի Չերչինյանը, ողջունելով առաքելության անդամներին, կարևորել է ԱԶԲ-ի հետ համագործակցությունը և այն ծրագիրը, որ համատեղ պետք է իրականացվի։ Նա ընդգծել է, որ Ճանապարհային դեպարտամենտն ԱԶԲ-ի հետ ունի բազմամյա համագործակցության փորձ, և այդ փորձը հիմք է տալիս ասելու, որ ապագա գործակցությունը նույնպես պսակվելու է հաջողությամբ։

Հանդիպման ընթացքում քննարկվել են ծրագրի իրականացման հետ կապված բազմաբնույթ հարցեր, որոնք առնչվում էին ծրագրի ֆինանսական պլանին‚ գնման գործընթացներին‚ շրջակա միջավայրի պահպանությանը‚ սոցիալական ազդեցություններին, ծրագիրն իրականացնող աշխատանքային թիմի կարողություններին։ Քննարկվող հարցերի նպատակն էր նվազեցնել հնարավոր ռիսկերը, որոնք կարող են առաջանալ հետագա աշխատանքների ընթացքում։

Այսօր արդեն ԱԶԲ պատվիրակությունը Ճանապարհային դեպարտամենտի աշխատակիցների ուղեկցությամբ մեկնել է Սյունիքի մարզ՝ տեղում ուսումնասիրելու Սիսիան-Քաջարան ճանապարհի հյուսիսային ենթահատվածի ծրագիծը, ինչպես նաև այլ հարցեր։

ԱԶԲ առաքելության շրջանակներում աշխատանքային քննարկումները կշարունակվեն մինչև հունիսի 13-ը։

Նշենք, որ այս տարվա մարտի 18-ին Հայաստանն ու ԱԶԲ-ը 236 մլն եվրոյի վարկային համաձայնագիր են ստորագրել "Հյուսիս-Հարավ" տրանսպորտային միջանցքի Սիսիան-Քաջարան ճանապարհի հյուսիսային հատվածի կառուցման համար: Համաձայնագրի շրջանակում նախատեսվում է կառուցել 27.1 կմ երկարությամբ ասֆալտբետոնե ճանապարհ, որը դիմակայուն է կլիմայական բարդ պայմաններին և բնական աղետներին, ինչը թույլ կտա կրճատել Սիսիան - Քաջարան ճանապարհահատվածի երկարությունը: Արդյունքում կկրճատվի ուղևորությունների տևողությունը, կավելանա տրանսպորտային միջոցների միջին արագությունը, կբարձրանա ուղևորությունների հարմարավետությունն ու անվտանգությունը: Սիսիան - Քաջարան շուրջ 60 կմ երկարությամբ նոր ճանապարհահատվածի շինարարությունը, ներառյալ Բարգուշատի թունելը, նախատեսվում է սկսել 2025 թվականին: Աշխատանքները կիրականացվեն երեք ենթաբաժիններով ՝ հյուսիսային հատված՝ 27,12 կմ երկարությամբ, Բարգուշատի թունելի հատված՝ 8,65 կմ երկարությամբ, և հարավային հատված՝ 24,25 կմ երկարությամբ:

Ճանապարհահատվածի երեք ենթաբաժինների կառուցման համար նախատեսվում է ծախսել 708 մլն եվրո վարկային միջոցներ։ Սիսիան - Քաջարան 60 կմ երկարությամբ նոր ճանապարհը կլինի տեխնիկական երկրորդ կարգի։ Այն կանցնի լեռնային բարդ ռելիեֆով, կներառի 27 կամուրջ՝ 4,7 կմ ընդհանուր երկարությամբ, և 9 թունել՝ 12,5 կմ ընդհանուր երկարությամբ (Բարգուշատի ամենաերկար թունելը՝ մոտ 8,6 կմ երկարությամբ): Այդ նախագծով ավարտվել է միջազգային մրցույթի նախաորակավորման փուլը, որին մասնակցելու հայտ են ներկայացրել 23 ընկերություններ Եվրոպայից, Չինաստանից և այլ երկրներից: ԵՄ կողմից Հայաստանին տրամադրվող 2,6 մլրդ եվրո ֆինանսական աջակցության ընդհանուր փաթեթից առաջիկա հինգ տարիներին 600 մլն եվրոն կուղղվի Քաջարան-Սիսիան ճանապարհի կառուցմանը: Եվս 200 մլն դոլար կտրամադրի Կայունացման և զարգացման եվրասիական հիմնադրամը, 500 մլն դոլար արդեն տրամադրել է ԱԶԲ-ը ։ 60 կմ երկարությամբ ճանապարհահատվածը կլինի 80 կմ/ժ հաշվարկային արագությամբ ։

Հյուսիս-Հարավ մայրուղին անկախ Հայաստանի պատմության մեջ ամենախոշոր ենթակառուցվածքային նախագծերից մեկն է ։ Այն կկրճատի իրանական և վրացական սահմանների միջև հեռավորությունը 550 կմ-ից մինչև 470 կմ, կարագացնի տարանցումը երկրի տարածքով և կստեղծի նոր լոգիստիկ հնարավորություններ՝ ներառյալ Իրանից դեպի Սև ծով բեռների փոխադրումը: