Հայաստանի կառավարությունը հավանություն է տվել Ասիական զարգացման հիմնադրամի 1 մլն դոլարի չափով համալրմանը

Արմինֆո.Հայաստանի կառավարությունը հունիսի 12-ին հավանություն է տվել 1 մլն դոլարի հատկացմանը՝ Ասիական զարգացման հիմնադրամի 13-րդ հերթական համալրման եւ Տեխնիկական օգնության հատուկ հիմնադրամի 8-րդ հերթական համալրման շրջանակներում:

Ինչպես ասվում է փաստաթղթի հիմնավորման մեջ,Ասիական զարգացման հիմնադրամը (այսուհետ՝ ԱԶՀ, Հիմնադրամ)  ստեղծվել է 1974թ.՝ որպես Ասիական զարգացման բանկի (այսուհետ՝ ԱԶԲ, Բանկ) արտոնյալ վարկավորման մեխանիզմ, որն առաջարկում է շատ ցածր տոկոսադրույքներով վարկեր Բանկի ամենաաղքատ անդամներին: Այն միտված է Ասիա-խաղաղօվկիանոսյան տարածաշրջանի աղքատ երկրներում աղքատության կրճատմանը և կյանքի որակի բարելավմանը (Հիմնադրամի գործունեության արդյունքում տարածաշրջանում օրական 2,15 դոլարից պակաս եկամուտ ունեցող աղքատների թիվը 1974-ից ի վեր կտրուկ նվազել է՝ 1 միլիարդից հասնելով 200 միլիոնի):

Լինելով ԱԶԲ-ի ամենամեծ Հատուկ հիմնադրամը և ԱԶԲ-ի դրամաշնորհների հիմնական աղբյուրը՝ ԱԶՀ շարունակում է առանցքային դեր ունենալ ԱԶԲ-ի ամենախոցելի անդամ պետություններում տնտեսական կայունության ստեղծման և պահպանման գործընթացում: ԱԶՀ ռեսուրսները հիմնականում ձևավորվում են ԱԶԲ անդամ երկրների կողմից պարբերական համալրումների շրջանակներում մոբիլիզացված ներդրումների և ԱԶԲ սովորական կապիտալ ռեսուրսներից ստացված եկամուտների զուտ փոխանցումների հաշվին: 

Հիմնադրման պահից ի վեր ԱԶՀ-ն համալրվել է 12 անգամ՝ 36 գործընկերների մասնակցությամբ։ Համալրվելով ֆինանսավորման այլ աղբյուրներով, ներառյալ վարկերի մարումները և ԱԶԲ-ից զուտ եկամուտների փոխանցումները, Հիմնադրամը իր գոյության ընթացքում տրամադրել է ավելի քան 85 միլիարդ ԱՄՆ դոլարի արտոնյալ վարկեր և դրամաշնորհներ 36 զարգացող անդամ երկրներին:  12-րդ համալրման շրջանակում (ԱԶՀ 13-րդ շրջափուլ, 2021-2024թթ.) Հիմնադրամից աջակցություն ստացող 5 երկրներ դարձել են Հիմնադրամի դոնոր երկրներ, որոնց թվում է նաև Ադրբեջանը: ԱԶՀ նոր 13-րդ համալրման (ԱԶՀ 14-րդ շրջափուլ, 2025-2028թթ.) ներդրողների շարքում 2025թ. որպես դոնոր ներգրավված է նաև Հայաստանը:

Հիմնադրամի 13-րդ (ԱԶՀ 14) համալրման համար դոնորները երաշխավորել են իրականացնել ընդհանուր 4,995,310,176 ԱՄՆ դոլարի չափով ներդրում (2025-2028թթ.), որից 2,564,310,176 ԱՄՆ դոլարը նոր դոնորներից ներդրումների ներգրավման հաշվին (ԱԶՀ-13-ի համեմատ աճել է 9 %-ով): Մնացած 2,431,000,000 ԱՄՆ դոլարը կֆինանսավորվի՝ ԱԶԲ հիմնական կապիտալ միջոցներից ստացվող զուտ շահույթից`  1,574,000,000 ԱՄՆ դոլար ԱԶԲ կառավարիչների խորհրդի տարեկան որոշումների հիման վրա (ԱԶՀ 13-ի համեմատ աճել է 35 %-ով),  ԱԶՀ նախկին շրջափուլերում գոյացած աղբյուրներից՝ 506,000,000 ԱՄՆ դոլար,  իրացվելի ակտիվներում կատարված ներդրումներից ստացվող եկամտից՝  351,000,000 ԱՄՆ դոլար:

Տեխնիկական աջակցության հատուկ հիմնադրամի ութերորդ կանոնավոր համալրման (ՏԱՀՀ-8) արդյունքում գոյացած բավարար միջոցները կարևոր դեր կկատարեն վերափոխվող և բարձրորակ նախագծերի կատարման և դրանց մշտադիտարկման, կայուն զարգացման և գլոբալ մարտահրավերներին դիմակայելու գործում՝ նպաստելով կլիմայական օրակարգին, գենդերային հավասարությանը, պետական պարքտի կայունությանը, մասնավոր հատվածի զարգացմանը և  այլն:

Հայաստանի Հանրապետության մասնաբաժինը ԱԶՀ 14-րդ շրջափուլում կազմում է ընդհանուրի 0.03%՝ 1,000,000 ԱՄՆ դոլար:

«Որպես դոնոր ԱԶՀ ռեսուրսների համալրմանը Հայաստանի շարունակական մասնակցությունը կդիտարկվի որպես Ասիական զարգացման բանկի հետ արդյունավետ փոխգործակցությունը խորացնելու քայլ:

Նշենք նաև, որ ըստ ցանկության՝ Հայաստանի Հանրապետությունը ԱԶՀ ռեսուրսների համալրմանը կարող է մասնակցել հասարակ, անտոկոս, ցպահանջ մուրհակ թողարկելու եղանակով», - ասվում է փաստաթղթում: