Օվերչուկը չի բացառել Ռուսաստանի համար Հայաստանի երկնքի փակումը՝ վերջինիս եվրաինտեգրման խորացման դեպքում

Արմինֆո. Ռուսաստանը մտավախություն ունի, որ Հայաստանի եվրաինտեգրման խորացումը կարող է հանգեցնել ռուսական ինքնաթիռների համար նրա օդային տարածքի փակման, ինչպես ավելի վաղ դա արել էր Եվրամիությունը: Այդ մասին հայտարարել է ՌԴ փոխվարչապետ Ալեքսեյ Օվերչուկը՝ ելույթ ունենալով Պետերբուրգի միջազգային տնտեսական համաժողովի նստաշրջանում։

"Տեսեք, մենք հիմա Եվրամիության հետ ավիացիոն հաղորդակցություն չունենք։ ԵՄ-ը փակել է երկինքը ռուսական օդանավերի թռիչքի համար։ Հայաստա՞նն էլ կփակի երկինքը: Եթե դուք անդամակցում եք Եվրամիությանը, ապա՝ այո, որովհետև ձեզ Բրյուսելում կասեն՝ փակեք երկինքը, և դուք կփակեք երկինքը, և դուք ընտրություն չեք ունենա։ Եւ ի՞նչ",- ըստ ՏԱՍՍ-ի՝ ասել է նա։

Ռուսաստանի փոխվարչապետը նշել է, որ հնարավոր սահմանափակումը կազդի չվերթների զգալի քանակի վրա, ինչպես նաև կարող է խախտվել բեռնափոխադրումների համակարգը: "Ահա շաբաթական բոլոր այդ հարյուրավոր ավիաչվերթները, ու՞ր են գնալու։ Դե, Թբիլիսիով են երթևեկելու, հասկանալի է, - շարունակել է նա ։ - Նույնն է սահմանին եղած փոխադրամիջոցների դեպքում, դուք դա գիտեք, որովհետև հայկական բեռնատարը կհասնի Վերին Լարս, այնուհետև բեռը կտեղափոխվի բելառուսական կամ ռուսական քարշակ, որը բեռը կհասցնի Ռուսաստան, իսկ հայ վարորդը հետ կգնա Հայաստան: Ահա դա կարող է իրականում տեղի ունենալ"։

"Եվ դրան չի կարելի ուշադրություն չդարձնել և չմտածել այդ հարցերի մասին։ Մենք դրա մասին մտածում ենք, մենք դա գնահատում ենք", - ընդգծել է Օվերչուկը։

Նշենք, որ ՀՀ կառավարությունը հունվարի 9-ին հավանություն է տվել "ԵվրաՔվե" քաղաքացիական նախաձեռնության առաջարկած ՝ Եվրոպական միությանն անդամակցելու գործընթաց սկսելու մասին օրենքի նախագծին: Մարտի 26-ին երկրի խորհրդարանը վերջնական ընթերցմամբ ընդունել է այն և ուղարկել նախագահի ստորագրմանը։ Մոսկվայում հայտարարել են, թե Ռուսաստանը Հայաստանին տեղեկացրել է, որ Եվրասիական տնտեսական միությանը և Եվրամիությանը միաժամանակյա անդամակցությունն անհնար է: