ՀՀ կառավարությունն իրավունք կստանա հաստատել նոր տրանսպորտային միջոցների ձեռք բերմանն աջակցության ծրագրերը

Արմինֆո.Տրանսպորտի առանձին տեսակներով ուղևորափոխադրումների և բեռնափոխադրումների զարգացման նպատակով ՀՀ կառավարությունն իրավունք կստանա հաստատել նոր տրանսպորտային միջոցների ձեռք բերման, ինչպես նաև ուղևորների և բեռների փոխադրումների ծավալների ավելացման գործում ֆիզիկական և իրավաբանական անձանց աջակցության ծրագրեր: ՀՀ Ազգային ժողովը հուլիսի 1-ի արտահերթ նիստում առաջին ընթերցմամբ քննարկում է "Տրանսպորտի մասին"  օրենքում կատարված փոփոխությունները:

Ներկայացնելով կառավարության օրենսդրական նախաձեռնությունը՝  տարածքային կառավարման և ենթակառուցվածքների նախարարի տեղակալ Արմեն Սիմոնյանը նշել է, որ օրինագիծն ուղղված է համայնքներում տրանսպորտային խնդիրների լուծմանը: ՀՀ կառավարության 2021-2026 թվականների միջոցառումների ծրագիրը սահմանում է կանոնավոր ուղևորափոխադրումների ոլորտում բարեփոխումների իրականացումը, որի շրջանակներում նախատեսվում է երկրի տարածքում ներդնել միասնական երթուղային ցանց: Միջմարզային և ներմարզային կանոնավոր ուղևորափոխադրումների որակի բարձրացման նպատակով իրականացվող բարեփոխումներն ուղղված են մրցութային ընթացակարգերի միջոցով տրանսպորտային երթուղիների օպերատորների ցանցի ձևավորմանը: Այդ խնդիրը նախատեսվում է լուծել նախկին 1 երթուղի - 1 սպասարկման օպերատոր սկզբունքից մեկ տարածաշրջանի կամ մարզի երթուղիներ՝ 1 սպասարկման օպերատորի սկզբունքին անցնելու միջոցով: Այսպիսով, նախատեսվում է ձևավորել միասնական երթուղային ցանց Հայաստանի Հանրապետության ողջ տարածքում։ Միասնական երթուղային ցանցի ներդրման համար անհրաժեշտ է իրականացնել խոշոր ներդրումներ՝ բոլոր երթուղիների սպասարկման կամ մեքենաների պարկի թարմացման համար տրանսպորտային միջոցներ ձեռք բերելու նպատակով: Որոշ մարզերում միասնական երթուղային ցանցի ներդրման համար հայտարարված մրցույթները չեն կայացել հայտերի բացակայության պատճառով, ինչը կապված է խոշոր ներդրումների բիզնես ռիսկերի հետ: Որոշ դեպքերում մրցույթներին մասնակցելու համար ներկայացվում է միայն մեկ հայտ, ինչը բացառում է առողջ մրցակցությունը: Նախագիծը մշակվել է ցանցի ստեղծման գործընթացն ավարտին հասցնելու, ինչպես նաև կառավարության աջակցությամբ տրանսպորտային համակարգի զարգացմանն ուղղված միջոցառումներ իրականացնելու համար:

Օրենքի նախագծի հիմնավորման համաձայն՝ տրանսպորտի այլ տեսակներով ուղևորափոխադրումների և բեռնափոխադրումների զարգացման, հանրապետությունում էլեկտրաշարժունակության բարձրացման, քաղաքային համայնքներում օդի աղտոտվածության նվազեցման համար անհրաժեշտ է իրականացնել էլեկտրատրանսպորտի և մետրոպոլիտենի զարգացմանն աջակցող ծրագրեր: Երևանում մետրոպոլիտենի զարգացումը և մետրոյի նոր կայարանների կառուցումը կարևոր նախապայման են տրանսպորտի բեռնաթափման, խցանումների կրճատման և օդի աղտոտվածության նվազեցման համար:

Օդային և երկաթուղային տրանսպորտի ոլորտում աջակցության ծրագրերը կարող են օգտագործվել ենթակառուցվածքների զարգացման, ուղևորափոխադրումների և բեռնափոխադրումների ծավալների ավելացման համար: