Կալասը՝ Երևանում. Տնտեսական դիվերսիֆիկացումը բխում է ձեր իսկ շահերից

Արմինֆո.  Եվրամիությունը խորացնում է Հայաստանի հետ համագործակցությունը տարբեր մակարդակներում, կան բազմաթիվ խնդիրներ, որոնց բախվում են բոլորը։ Այդ մասին հայտարարել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը՝ Հայաստանի Հանրային հեռուստատեսության հետ  հարցազրույցում։

"Մենք խորացնում ենք համագործակցությունը Հայաստանի հետ տարբեր մակարդակներում ։ Կան բազմաթիվ խնդիրներ, որոնց բախվում են բոլորը. կիբերանվտանգություն, հիբրիդային սպառնալիքներ, արտաքին ներգործություն և միջամտություն ընտրական գործընթացներին։ Այդ բոլոր ոլորտներում մենք կարող ենք համագործակցել", - ասել Է դիվանագետը։ Նրա խոսքով՝ կարելի է համագործակցել նաև ճգնաժամերի կառավարման ոլորտում, և ԵՄ-ն ու Հայաստանն արդեն ստորագրել են այդ ոլորտում համագործակցության շուրջ համաձայնագիր: Նա նշել է, որ Հայաստանն իր պատրաստակամությունն է հայտնել մասնակցելու երրորդ երկրներում կայունության հաստատման ԵՄ առաքելություններին:

Հարցին, թե ինչ է ենթադրում ԵՄ-Հայաստան գործընկերության նոր օրակարգը, Կալասը պատասխանել է, որ այն բացում է նոր ուղղություններ, որոնց թվում են նաև տնտեսական համագործակցությունը, օգնությունը Լեռնային Ղարաբաղից փախստականներին:

Անդրադառնալով ԵՄ-ի կողմից Հայաստանին տրամադրվող 270 մլն եվրո օգնությանը՝ եվրոպացի պաշտոնյան հաղորդել է, որ միջոցները կտրամադրվեն Եվրամիության "Կայունություն և աճ" ծրագրի շրջանակում և կուղղվեն երկրի տնտեսությանը, այդ թվում՝ բիզնեսին աջակցելու, քաղաքացիների բարեկեցությունն ապահովելու համար:

Ընդ որում, Կալասը խուսափել է պատասխանել հաղորդավարի ուղիղ հարցին, թե արդյոք Հայաստանին սպասում են ԵՄ-ում։ Նա նշել է, որ ԵՄ-ին անդամակցելու գործընթաց սկսելու որոշումը պատկանում է հայ ժողովրդին։ "Սակայն, եթե նայենք ավելի լայն գծերին, Եվրոպայի քարտեզին, ապա ակնհայտ են դառնում փոխադարձ համագործակցության օգուտները", - ասել է նա: Ընդ որում, պաշտոնյան խոստովանել է, որ որոշ դեպքերում թեկնածու երկրները երկար են սպասել այդ կառույցին անդամակցելուն, եւ այժմ ԵՄ-ն ձգտում է արագացնել այդ գործընթացները: "Երբ խոսքը վերաբերում է Հայաստանին, դուք մեր անմիջական հարևանն եք, և մեր շահերից է բխում մեր հարևանության զարգացումը, որպեսզի Հայաստանի տնտեսությունը զարգանա, իսկ քաղաքացիների բարեկեցությունն ավելանա", - ասել է նա, ևս մեկ անգամ վստահեցնելով, որ ԵՄ-ը և Հայաստանը երբեք այսքան մոտ չեն եղել միմյանց, որքան այսօր, և Եվրամիությունում պատրաստ են ուսումնասիրել համագործակցության նոր հնարավորությունները:

Անդրադառնալով այն հանգամանքին, որ Հայաստանը լուրջ տնտեսական կախվածություն ունի Ռուսաստանից, Կալասը նշել է "բոլոր հավկիթները մեկ զամբյուղում պահելու" վտանգը: "Կախված լինել այնպիսի երկրներից, որոնք, հնարավոր է, այնքան էլ բարեկամական չեն։ Այդ իսկ պատճառով անհրաժեշտ է տնտեսական դիվերսիֆիկացում։ Բնականաբար, ձեր հարևաններն այդքան էլ պարզ չեն, բայց մենք էլ շահագրգռված ենք տնտեսական հաղորդակցությունների ապաշրջափակմամբ և ձգտում ենք ընդլայնել Հայաստանի հնարավորությունները, որպեսզի դուք ստիպված չլինեք լիովին կախված լինել Ռուսաստանից: Իհարկե, եթե ցանկանում եք, ընտրությունը ձերն է: Բայց մենք տեսանք, թե ինչպես է տնտեսական կախվածությունն օգտագործվել ըդդեմ, ուստի պետք է կապեր հաստատել բարեկամների հետ", - հավաստիացրել է ԵՄ գլխավոր դիվանագետը։

Կալասը նաեւ ընդհանուր գծերով պատասխանել է այն հարցին, թե արդյոք ԵՄ-ն իրականում Հայաստանին օգտագործում է Հարավային Կովկասում իր աշխարհաքաղաքական նպատակների համար, ինչպես պնդում է ՌԴ-ը: Նրա հավաստմամբ՝ ԵՄ-ը Հայաստանի բարեկամ երկրներ են, բայց որոշողը դուք եք։ "Մեր նպատակը տարածաշրջանի բարեկեցության ապահովումն է, քանի որ մեր հարևանների այսօրվա խնդիրները վաղը մերն են դառնալու։ Եթե դուք բախվում եք տնտեսական խնդիրների, դա անդրադառնում է նաև մեզ վրա, տարածաշրջանի կայունության վրա։ Դրա համար էլ, կարծում եմ, որ տնտեսական դիվերսիֆիկացումը բխում է ձեր իսկ շահերից", - ասել է նա։

Խոսելով հայ-ադրբեջանական կարգավորման մասին՝ ԵՄ պաշտոնյան հավաստիացրել է, որ այդ հարաբերությունների կարգավորումը բխում է նաեւ Բրյուսելի շահերից, և ԵՄ-ում պատրաստ են շարունակել աջակցել Երևանի և Բաքվի միջև հարաբերությունների կարգավորմանը: