Viva-ի 20 տարին. Բարձր տեխնոլոգիական արդյունաբերության նախարարը նշել է Հայաստանի հեռահաղորդակցության ոլորտի փոփոխությունները

Արմինֆո.  ՀՀ բարձր տեխնոլոգիական արդյունաբերության նախարար Մխիթար Հայրապետյանը նախօրեին մասնակցել է Viva ընկերության հիմնադրման 20-ամյակին նվիրված միջոցառմանը:

Շնորհավորելով ընկերության թիմին նշանակալի իրադարձության կապակցությամբ՝ իր ելույթում նախարար Հայրապետյանն անդրադարձել է Viva-ի ունեցած կարևորագույն դերակատարությանը՝ Հայաստանում տեխնոլոգիաների զարգացման ու առաջընթացի գործում։

«Հայաստանի հեռահաղորդակցության շուկայում 2005թ. հուլիսի 1-ը հեղափոխական տարեթիվ է: Այդ օրը նշանավորվեց ոչ միայն Հայաստան նոր տեխնոլոգիաների և նորարարությունների մուտքով, այլև ամենակարևորը՝ կոտրվեց այն կարծրատիպը, թե իբր բջջային կապը միայն ընտրյալների համար է: Viva-ն ապացուցեց, որ բջջային կապը կարող է լինել ավելի մատչելի, ավելի որակյալ, ավելի հասանելի: Ուզում եմ շնորհակալություն հայտնել Viva-ի թիմին, որ այս ամենը կարողացավ իրականություն դարձնել:

Վերլուծելով այս տարիների ընթացքում Viva-ի անցած ուղին՝ կարող եմ վստահաբար ասել, որ Viva-ն ապագայում ևս ապավինելու է նոր տեխնոլոգիական լուծումների, նորարարությունների՝ էլ ավելի որակյալ դարձնելով իր ծառայությունները բաժանորդների համար և այդպիսով հզորացնելով հայաստանյան հեռահաղորդակցության ոլորտը»,- ասել է Մխիթար Հայրապետյանը։։

Նշենք, որ երեկ հաաայտնի է դարձել, որ "Viva Armenia" ՓԲԸ-ն (Viva ապրանքանիշ) մտադիր է ձեռք բերել "GNC-ALFA" ՓԲԸ-ի (OVIO ապրանքանիշ, նախկինում ՝ "Ռոստելեկոմ") բաժնետոմսերի 100% - ը։ Հաշվի առնելով, որ Բարձր տեխնոլոգիական արդյունաբերության նախարարությունը գործարքի վերաբերյալ որևէ առարկություն չի ներկայացրել, իսկ Անվտանգության ծառայությունը գործարքի կնքման դեպքում ազգային անվտանգության կամ պետական շահերի համար վտանգ չի տեսնում, ՀԾԿՀ-ը մտադիր է դրական եզրակացություն տալ այսօրվա նիստում: -0-

Հիշեցնենք, որ 2024թ. հուլիսին "Վիվա Արմենիա" ՓԲԸ-ն հայտարարել էր, որ այսուհետ ընկերությունը շարունակելու է գործունեությունը հայաստանյան շուկայում Viva ապրանքանիշի (բրենդի) ներքո՝ Վիվա-ՄՏՍ-ի փոխարեն:

Ավելի վաղ՝ 2024թ. հունվարին, ՄՏՍ-ը հայտարարել էր Հայաստանում իր դուստր ընկերության՝ ՄՏՍ ՓԲԸ-ի բաժնետոմսերի 100% - ը կիպրական Fedilco Group Limited-ին վաճառելու գործարքի փակման մասին։ Գործարքի պարագծում է հայտնվել նաև "ՄոբիԴրամ" ՓԲԸ-ն, որը Հայաստանի շուկայում ֆինանսական ծառայություններ մատուցող վճարային համակարգ է, "ՄՏՍ Հայաստան" - ի 100% դուստր ընկերություն:

Գործարքից առաջ "ՄՏՍ Հայաստանը" պատկանում էր Aramayo Investments Limited-ին, որն, իր հերթին, լյուքսեմբուրգյան Allegretto Holding-ի միջոցով 100 տոկոսով ՄՏՍ-ի սեփականությունն էր: ԶԼՄ-ների տվյալներով ՝ Fedilco Group Limited-ի շահառուներն են Չժե Ջանգը և Կոնստանտին Սոկոլովը: Aramayo Investments Limited-ից կիպրական Fedilco Group Limited-ին <ՄՏՍ Հայաստանի> 100% բաժնետոմսերի վաճառքը հայկական կարգավորիչը հաստատել է 2023 թվականի նոյեմբերին։ Fedilco-ի համանման հայտը հանձնաժողովը կողմից մերժել էր 2023 թվականի ապրիլին, քանի որ այն "սպառնում էր Հայաստանի Հանրապետության ազգային անվտանգությանը կամ պետական շահերին"։

2024թ. փետրվարին ՀՀ կառավարությունը հավանություն է տվել "ՄՏՍ Հայաստան" ընկերության բաժնետոմսերի 20 տոկոսը ՀՀ կառավարությանը նվիրաբերելու մասին որոշմանը: Դրանց կառավարման լիազորությունները փոխանցվել են Հայաստանի Հանրապետության վարչապետի աշխատակազմին: Ընկերության տվյալներով ՝ այն սպասարկում է շուրջ 2,3 մլն բաժանորդի։