ՊԵԿ-ն առաջարկում է հետաձգել բնապահպանական և ճանապարհային հարկի, ինչպես նաև պետական տուրքի վճարումը՝  տրանսպորտային միջոցների ՀՀ մուտք գործելիս

Արմինֆո. Պետական եկամուտների կոմիտեն (ՊԵԿ) առաջարկում է հետաձգել պետական սահմանի ցամաքային անցման կետերում վճարվող բնապահպանական հարկի, ճանապարհային հարկի և պետական տուրքի վճարումները։  Համապատասխան նախաձեռնությունը զետեղված է իրավական ակտերի միասնական պորտալում:

Փաստաթղթի հիմնավորման համաձայն, գործող օրենսդրական նորմերին համապատասխան՝ ՀՀ-ում չգրանցված (չհաշվառված) ավտոտրանսպորտային միջոցներով ՀՀ մուտք գործող ավտոտրանսպորտային միջոցներից մթնոլորտային օդ վնասակար նյութերի արտանետման համար սահմանված կարգով հաշվարկված բնապահպանական հարկը պետական բյուջե է վճարվում ՀՀ մուտք գործելիս։ 

Նշվում է, որ բնապահպանական հարկի, ճանապարհային հարկի, պետական տուրքի վճարումը պետական սահմանի անցման կետերում կատարելու պահանջն առաջացնում է անհարկի կուտակումներ՝ պայմանավորված այն հանգամանքով, որ անձինք տրանսպորտային միջոցները կայանում են անցման կետում, մոտենում են ձևակերպման սրահին` կազմում են տարանցման հայտարարագիր, այնուհետ` մոտենում են անցման կետում գործող բանկին (որտեղ հաճախ լինում են հերթեր)` հարկերը, պետական տուրքը վճարելու նպատակով, ապա կրկին վերադառնում են ձևակերպման սրահ՝ վճարումը հավաստող անդորրագրերը ներկայացնելու և տարանցման հայտարարագրի բացթողումն իրականացնելու համար։

Այդ առնչությամբ, մասնավորապես, նախատեսվում է.

- բնապահպանականի հարկի վճարման ժամկետ սահմանել մինչև ավտոտրանսպորտային միջոցների ՀՀ մուտք գործելու օրվան հաջորդող 15-րդ օրը ներառյալ, իսկ մինչև նշված ժամկետը ՀՀ տարածքից ելքի դեպքում՝ մինչև ՀՀ տարածքից ելքը։ Սահմանվում է նաև, որ ավտոտրանսպորտային միջոցների ելքի ժամանակ հաշվարկված բնապահպանական հարկի գումարից պակաս վճարումների դեպքում մաքսային մարմինները պակաս վճարված հարկի գումարը և հարկի վճարումն ուշացնելու համար հաշվարկված տույժերի գումարները գանձում են ավտոտրանսպորտային միջոցների ելքի ժամանակ։ Միաժամանակ, մաքսային մարմինները կատարում են բնապահպանական հարկի պարտավորությունների (այդ թվում՝ բնապահպանական հարկի վճարումը հավաստող անդորրագրերի կամ վճարումը հավաստող այլ փաստաթղթերի)  հաշվառում՝ վճարումների անդորրագրերը (կամ վճարումը հավաստող այլ փաստաթղթերը) հետագայում կրկին որպես բնապահպանական հարկի վճարումը հավաստող փաստաթուղթ չօգտագործվելու համար,

- ճանապարհային հարկի վճարման ժամկետ սահմանել մինչև ավտոտրանսպարտային միջոցների ՀՀ մուտք գործելու օրվան հաջորդող 15-րդ օրը ներառյալ, իսկ մինչև նշված ժամկետը ՀՀ տարածքից ելքի դեպքում՝ մինչև ՀՀ տարածքից ելքը, միաժամանակ, ՀՀ տարածքում տասնհինգ օրից ավելի գտնվելու դեպքում յուրաքանչյուր հաջորդ տասնհինգ օրվա կամ ավելի պակաս ժամկետի համար ճանապարհային հարկի վճարման ժամկետ է սահմանվում մինչև ՀՀ տարածքում գտնվելու տասնհինգօրյա ժամկետը լրանալու օրվան հաջորդող 5-րդ օրը, իսկ մինչև նշված ժամկետը ՀՀ տարածքից ելքի դեպքում՝ մինչև ՀՀ տարածքից ելքը։ Սահմանվում է նաև, որ ավտոտրանսպորտային միջոցների ելքի ժամանակ հաշվարկված ճանապարհային հարկի գումարից պակաս վճարումների դեպքում մաքսային մարմինները պակաս վճարված հարկի գումարը և հարկի վճարումն ուշացնելու համար օրենսգրքով սահմանված կարգով հաշվարկված տույժերի գումարները գանձում են ավտոտրանսպորտային միջոցների ելքի ժամանակ։ Միաժամանակ, մաքսային մարմինները կատարում են ճանապարհային հարկի պարտավորությունների (այդ թվում՝ ճանապարհային հարկի վճարումը հավաստող անդորրագրերի կամ վճարումը հավաստող այլ փաստաթղթերի) հաշվառում՝   վճարումների անդորրագրերը (կամ վճարումը հավաստող այլ փաստաթղթերը) հետագայում կրկին որպես ճանապարհային հարկի վճարումը հավաստող փաստաթուղթ չօգտագործվելու համար,

«Պետական տուրքի մասին» ՀՀ օրենքի 19.9-րդ հոդվածի 1-ին մասի 4-րդ կետը ուժը կորցրած ճանաչել, իսկ 5-րդ կետով սահմանված դրույքաչափերը վերանայել:

Այսպես, առաջարկվում է "Պետական տուրքի մասին" ՀՀ օրենքի 1-ին մասի 4-րդ կետով սահմանված պետական տուրքի (5000 դրամ) վերացման պայմաններում վերանայել դրույքաչափերը (մինչև 3 տոննա ՝ 5000 դրամից մինչև 7000 դրամ, 3-10 տոննա՝ 10 000 դրամից մինչև 13 000 դրամ, 10-25 տոննա ՝ 15 000 դրամից մինչև 18 000 դրամ, 25-60 տոննա՝ 20 000 դրամից մինչև 24 000 դրամ, ավելի քան 60 տոննա՝ 30 000 դրամից մինչև 35 000 դրամ), ինչի արդյունքում, հաշվի առնելով վերը նշված աղյուսակում արտացոլված ապրանքների հայտարարագրերի միջին ամսական ծավալները, ամսական հավաքվելու է, միջին հաշվով, լրացուցիչ մոտ 35 մլն դրամ պետական տուրք:

2) ՀՀ-ում չգրանցված (չհաշվառված)՝ ՀՀ մուտք գործող ավտոտրանսպորտային միջոցներից մթնոլորտային օդ վնասակար նյութերի արտանետման համար բնապահպանական հարկի դրույքաչափերը սահմանել միասնական՝ նկատի ունենալով այն, որ նորմաների սահմաններից ավելի արտանետումների համար առկա են համապատասխան օրենսդրական կարգավորումներ, այդ թվում՝ նախատեսված է վարչական պատասխանատվություն, և բացի այդ պետական սահմանի անցման կետերում չափումների իրականացումն անիրատեսական է,

3) սահմանել, որ ՀՀ-ում չգրանցված (չհաշվառված) բեռնատար ավտոտրանսպորտային միջոցների ՀՀ տարածքից ելքը անհաղթահարելի ուժով` արտակարգ և տվյալ պայմաններում անկանխելի հանգամանքներով պայմանավորված անհնար լինելու դեպքում ճանապարհային հարկ վճարողներն ազատվում են համապատասխան ժամանակահատվածի համար հաշվարկման ենթակա ճանապարհային հարկից։ Տվյալ դեպքում, ճանապարհային հարկի արտոնությունից օգտվելու իրավունքը կհավաստվի համապատասխան պետական լիազոր մարմնի կողմից տրվող տեղեկանքով։