Արմինֆո. ՀՀ էկոնոմիկայի նախարար Գևորգ Պապոյանը հուլիսի 18-ին ընդունել է «Ամբեր Կապիտալ» ընկերության Լոնդոնի գրասենյակի կառավարող գործընկեր Կամիլիո Ազզուզիին և «Ամբեր Կապիտալ Արմենիա» ընկերության գլխավոր տնօրեն Անուշավան Սիմոնյանին։ Հանդիպմանը մասնակցել է նաև նախարարի տեղակալ Լիլյա Սիրականյանը։
Էկոնոմիկայի նախարարության հաղորդագրության համաձայն, հանդիպման ընթացքում քննարկվել են ԵՄ-Հայաստան ՓՄՁ ներդրումային հիմնադրամի գործունեության արդյունքները, ընթացիկ և նախատեսվող ներդրումային ծրագրերը, ինչպես նաև ֆոնդում ՀՀ կառավարության մասնակցության հետ կապված ընթացիկ հարցերը։
Նախարարը կարևորել է հիմնադրամի դերը հայկական տնտեսության տարբեր ոլորտների ֆինանսավորման գործում։
Ֆոնդն իր գործունեության ընթացքում արդեն իրականացրել է 13 ներդրում՝ էներգետիկա, սննդի վերամշակում, գյուղատնտեսություն, առողջապահություն և այլ ոլորտներում գործող ընկերություններում։
Կառավարության և «Ամբեր Կապիտալ»-ի ներկայացուցիչները վերահաստատել են արդյունավետ համագործակցությունը շարունակելու պատրաստակամությունը՝ ուղղված Հայաստանի տնտեսության երկարաժամկետ զարգացմանը։
