Էկոնոմիկայի նախարարը փորձել է բացատրել Ջենիֆեր Լոպեսի համերգի կազմակերպման ծախսերը

Արմինֆո. Ջենիֆեր Լոպեսի երևանյան համերգի շնորհիվ Հայաստանի պետական բյուջեն համալրվել է 13.3 մլն դոլարով, մինչդեռ, դրա կազմակերպման համար պետությունը 6 մլն դոլար է ուղղել: Այդ մասին «Ֆեյսբուքի» իր էջում գրել է ՀՀ էկոնոմիկայի նախարար Գևորգ Պապոյանը՝ անդրադառնալով Հայաստան այցելող զբոսաշրջիկների ծախսերի վերաբերյալ իտալա-հայկական կոնսորցիումի հետազոտության արդյունքներին։

«Ըստ Ջեննիֆեր Լոպեսի համերգի կազմակերպիչների Հայաստան է եկել 15000 զբոսաշրջիկ։

2024-ին էկոնոմիկայի նախարարությունը հրապարակեց իտալահայկական կոնսորցիումի «այցելությունների հետազոտությունը», ըստ որի զբոսաշրջային փաթեթ ունեցողները Հայաստան գալով միջինում ծախսում են 888 դոլար, հետևաբար, հենվելով այս հետազոտության վրա, կարող ենք պնդել, որ այս համերգի վրա ծախսված 6 մլն դոլարի դիմաց ստացել ենք ավելի քան 13,3 մլն դոլար գումար։ Ընդ որում սրա մեջ ներառված չեն բազմաթիվ այլ արդյունքներ, ինչպիսիք են, օրինակ, երկրի հանրահռչակման արդյունքում ստացվող էֆֆեկտները։ Կարծում եմ հրաշալի կլինի, եթե տարեկան մի քանի այսպիսի աստղերի ելույթներ լինեն Հայաստանում։

ՀԳ։ Իհարկե համաձայն եմ, որ շատ դժվար է հստակ հաշվել իրական ծախսերի չափը, այդ թվում 888 դոլար ծախսը շատ մոտավոր է։ Օրինակ 180 հազար դրամանոց (մոտ 470 դոլար) տոմս գնած ու Հայաստանում 5-6 օր անցկացնող զբոսաշրջիկը ամենայն հավանականությամբ շատ ավելին կծախսի քան 888 դոլարը, իսկ Վրաստանից 2 օրով եկած ու 60 հազար դրամանոց (մոտ 155 դոլար) տոմս գնած զբոսաշրջիկը թերևս կծախսի 888 դոլարից ավելի քիչ», - գրել է նախարարը։

Հիշեցնենք, որ Ջենիֆեր Լոպեսի համերգը կայացել է օգոստոսի 3-ին Երևանի Հանրապետական մարզադաշտում: Երգչուհին Հայաստան էր ժամանել UP ALL NIGHT համերգային շրջագայության շրջանակում։