Հայաստանը եւս 6 ամսով երկարացնում է ներկրվող ամրանների համար պետական տուրքի գանձման ժամկետները

Արմինֆո.  Հայաստանը ևս 6 ամսով երկարացնում է երրորդ երկրներից ներմուծվող ամրանների համար պետական տուրքի գանձման ժամկետները: Այդ մասին որոշումն ընդունվել է ՀՀ կառավարության օգոստոսի 7-ի նիստում։

ՀՀ էկոնոմիկայի նախարար Գևորգ Պապոյանի խոսքով ՝ վերջին մի քանի տարիներին երկրում սև և գունավոր մետաղների ջարդոնի վերամշակման մեջ ներդրումների ծավալը կազմել են 150 մլն դոլար, ստեղծվել են հազարավոր նոր աշխատատեղեր. Ներկայումս Հայաստանի Հանրապետությունում գործում են "Չարենցավանի հաստոցաշինական գործարան" ԲԲԸ,  "Նիկոլ Դուման" ԲԸ, "Ձուլակենտրոն" ԲԲԸ ձուլարանները, ինչպես նաև կառուցվում և վերակառուցվում են "GTB Steel" ՍՊԸ, "Քարակերտի քարաձուլական գործարան" ԲԲԸ ձուլարանները, որոնք ուղղված են հանրապետության մետաղագործական արդյունաբերության զարգացմանը: Հանրապետությունում գործող և կառուցվող ձուլարանների արտադրական հնարավորությունները թույլ կտան ավելացնել պողպատյա ամրանների տեղական արտադրության ծավալները, ուստի անհրաժեշտ է ապահովել հավասար մրցակցային պայմաններ տեղական արտադրողների կողմից արտադրվող և երրորդ երկրներից, առաջին հերթին, Իրանից ներմուծվող նմանատիպ արտադրանքի միջև: Ներմուծվող մետաղական իրերի նկատմամբ կիրառվելու է 29 հազար դրամ բազային տուրք: Ներքին կարիքները բավարարելուց հետո, հնարավոր է, կարելի է մտածել նաև պատրաստի արտադրանքի արտահանման մասին։

Ավելի վաղ ՀՀ կառավարությունը մի շարք որոշումներով արգելել էր սև և գունավոր մետաղների ջարդոնի և դրանք պարունակող թափոնների արտահանումը: Նշված սահմանափակումներն ուղղված են տեղում սև և գունավոր մետաղների ջարդոնի վերամշակման, թափոններից մետաղների կորզման և ավելի բարձր ավելացված արժեք ունեցող արտադրանքի արտադրության խթանմանը: 2022-2024 թվականներին Հայաստանի Հանրապետություն ներմուծված թիրախային արտադրանքի մեծ մասը՝ 75.5%, իսկ ընդհանուր արտահայտությամբ՝ 80.2%-ը, ներմուծվել է Իրանի Իսլամական Հանրապետությունից: Վերլուծությունը ցույց է տալիս, որ Իրանից (առանց ԱԱՀ-ի) ապրանքային դիրքի 1 տոննա ապրանքի (ամրանային գլանվածք) գինը Հայաստանում կազմում է 200 հազարից մինչև 205 հազար դրամ: Իսկ Հայաստանում արտադրված պողպատե ամրանների 1 տոննայի արժեքը կազմում է մոտ 230-250 հազար դրամ։

Նշենք, որ ըստ վիճակագրական տվյալների, Իրանի Իսլամական Հանրապետությունից Հայաստանի Հանրապետություն պողպատե ամրանների ներկրումը շարունակաբար աճում է։ Մրցակցության պաշտպանության հանձնաժողովի կատարած ուսումնասիրությունների համաձայն, 2023 թվականին 2022 թվականի համեմատ 1 տոննա ամրանների միջին կշռված մաքսային արժեքը նվազել է 52 հազար դրամով ՝ 269 հազար դրամից մինչեւ 217 հազար դրամ։ Հայաստանի Հանրապետությունում արտադրված ամրանների 1 տոննայի միջին գինը կազմում է 259 600 դրամ, նվազագույն և առավելագույն գները կազմում են, համապատասխանաբար, 215 հազար և 300 հազար դրամ: