Գինու տուրիզմի համաշխարհային կազմակերպությունը հետաքրքրված է Հայաստանի հետ համագործակցությամբ

Արմինֆո. ՀՀ կրթության, գիտության, մշակույթի և սպորտի նախարար Ժաննա Անդրեասյանն ընդունել է Գինու տուրիզմի համաշխարհային կազմակերպության (GWTO) նախագահ Անտոնիո Վիդալի գլխավորած պատվիրակությանը: Հանդիպմանը ներկա է եղել նաև ԿԳՄՍ նախարարի տեղակալ Ալֆրեդ Քոչարյանը:

Ողջունելով հյուրերին՝ ԿԳՄՍ նախարար Ժաննա Անդրեասյանը նշել է, որ ՀՀ կառավարությունը կարևորում է գինեգործության ոլորտը. այն ազգային մշակութային արժեքավոր ժառանգություն լինելուց բացի, նաև զարգացող ուղղություն է մասնագիտական և բարձրագույն կրթության համակարգերում, և ուսանողների շրջանում մեծ պահանջարկ ունի: Ոլորտի առաջխաղացման համատեքստում Ժաննա Անդրեասյանը մասնավորապես կարևորել է Հայաստանի ազգային ագրարային համալսարանի հետ համագործակցության, համատեղ կրթական ծրագրերի իրականացման հնարավորությունը:

ԿԳՄՍՆ հաղորդագրության համաձայն, հանդիպման ընթացքում անդրադարձ է եղել նաև «Զվարթնոց» պատմամշակութային արգելոց-թանգարանի գինու հնձանի վերականգնման և ամրակայման աշխատանքներին, որը ևս վկայում է գինեգործության՝ որպես հնագույն քաղաքակրթության և մշակութային ժառանգության նկատմամբ պետական քաղաքականության մասին:

(GWTO) նախագահ Անտոնիո Վիդալը ներկայացրել է կազմակերպության գործունեությունը էնոտուրիզմի ոլորտում՝ նշելով, որ իրենք հետաքրքրված են Հայաստանի հետ համագործակցությամբ:

Նշենք, որ ըստ ՀՀ վիճակագրական կոմիտեի տվյալների ՝ Հայաստանում գինու արտադրությունը կրճատվել է 36,3 տոկոսով ՝ կազմելով 2,8 մլն լիտր։

Մաքսային ծառայության տվյալներով՝ 2024 թվականին Հայաստանը գինու արտահանումը կրճատել Է 4,1 տոկոսով՝ մինչև 4,3 մլն լիտր։ Արտահանվող գինու մաքսային արժեքը նվազել է 3,1 տոկոսով՝ մինչև 17,7 մլն դոլար։

Հայկական գինու իրացման հիմնական շուկան ավանդաբար ռուսականն է, որի մասնաբաժինը 2024 թվականին 83,2%-ից նվազել է մինչև 79,6%: Դրան հաջորդում են ԱՄՆ-ը (7%), Լեհաստանը (1,4%), Ֆրանսիան (1,2%), Չինաստանը (1%), Լիտվան և Բելգիան (0,8-ական տոկոս), Գերմանիան (0,7%): Շատ ավելի փոքր ծավալ է մատակարարվել Վրաստան, Ղազախստան, Կանադա, Լատվիա, Բրիտանիա, Նիդերլանդներ, Իսրայել, Իտալիա, Հունաստան, Գերմանիա, Ավստրալիա, ԱՄԷ, Բուլղարիա, Բելգիա, Թուրքմենստան, Շվեյցարիա, Ուկրաինա, Չեխիա, Ուզբեկստան, Ուրուգվայ, Սինգապուր: 1000 լիտրից պակաս արտահանվել է Լիբանան, Հնդկաստան, Ավստրիա, Էստոնիա, Իսլանդիա, Իսպանիա, Ճապոնիա, Շվեդիա, Պորտուգալիա, Վիետնամ, Քենիա: