762 բեռնատար, թե՞ զանգվածային վերադարձ. Իշխանությունն ու ընդդիմությունը միմյանց մեղադրում են ստի մեջ

Արմինֆո.  Վերին Լարսի անցակետից գյուղմթերքով, սալորով, դեղձով, խաղողով բեռնված հարյուրավոր մեքենաներ ետ են վերադառնում: Այդ մասին «Ֆեյսբուքի» իր էջում գրել է Ազգային ժողովի "Հայաստան" խմբակցության պատգամավոր Գառնիկ Դանիելյանը ՝ իր հրապարակմանը կցելով համապատասխան տեսանյութ:

«Բեռնափոխադրողներն ահազանգում են, որ իրենց չի տրվում հստակ պատճառաբանություն, խոսվում է բուսասանիտարիայի հետ կապված ինչ-որ խնդիրների մասին: Այս ամենի հետևանքով հսկայական վնասներ են կրում գյուղացիները, գյուղատնտեսությամբ զբաղվողները:

Նշեմ, որ այլ ապրանքներով բեռնված բեռնատարներ ևս ենթարկվում են մանրակրկիտ զննման, ինչի հետևանքով խոչընդոտվում է վերջիններիս մուտքը Ռուսաստանի Դաշնություն: Մասնավորապես, խնդիրների են բախվում շինանյութ փոխադրող մեքենաները, ինչն աննախադեպ է այս ոլորտի պարագայում:

Բազմաթիվ բեռնատարներ անորոշության մեջ դեռևս սպասում են որոշման:

Ինչպես միշտ, պատկան մարմինների կողմից չկա համապատասխան արձագանք, գործողություններ:

Ակնհայտ է, որ խնդիրը միայն տնտեսական չէ, ունի քաղաքական ենթատեքստ Շնորհավոր «Թրամփի ճանապարհ», - գրել է պատգամավորը:

Պետական մարմինների արձագանքը երկար չի սպասեցրել։ Էկոնոմիկայի նախարար Գևորգ Պապոյանը, պատգամավորին մեղադրելով ստի մեջ, հաղորդել է, որ մտադիր է վաղվանից թվեր հրապարակել, որով կապացուցվի, որ ամեն օր շատ մեծ քանակի հայկական ապրանքներով բեռնված բեռնատարներ են մտնում ՌԴ, ու ընդդիմության տարածած պանիկան ընդամենը մեր ժողովրդի մեջ վախ տարածելու հերթական փորձն է։

Նրա ասելով՝ օգոստոս ամսվա ընթացքում ՌԴ է մտել Հայաստանի մրգերով և բանջարեղենով բարձված 762 բեռնատար մեքենա, և Վրաստանից հետ է վերադարձվել ընդամենը 4-ը։