Արմինֆո. Կոտայքի մարզի Ձորաղբյուր գյուղում 12 - րդ անգամ կմեկնարկի Բերքի փառատոնը՝ Harvest Fest-ը:
Փառատոնը սեպտեմբերի 6-7 - ը մեկ հարթակում ՝ կանաչ ուսումնական կենտրոնում (Green Training Center), կհավաքի ավելի քան 200 ֆերմերների, գործարարների և արտադրողների՝ Հայաստանից և այլ երկրներից:
Իրենց տաղավարներում մասնակիցները կներկայացնեն օրգանական գյուղատնտեսական մթերքներ, ավանդական ուտեստներ և ձեռագործ աշխատանքներ:
Փառատոնը կուղեկցվի համերգներով, մշակութային ներկայացումներով, երեխաների համար նախատեսված ժամանցային ծրագրով:
Harvest Fest-ն ամեն տարի անցկացվում է կայուն գյուղատնտեսության զարգացման և Հայաստանի ագրարային համայնքներին աջակցելու նպատակով: Փառատոնը հնարավորություն է ընձեռում ֆերմերներին, արտադրողներին, վերամշակողներին, գնորդներին, ներդրողներին, ոլորտի կազմակերպությունների ներկայացուցիչներին փորձի փոխանակման, համագործակցության և գործարար կապերի հաստատման համար:
