Փաշինյան. Հայաստանի Հանրապետությունը գտնվում է բարեկեցության պատմականորեն ամենաբարձր կետում

Արմինֆո.  2025 թվականի օգոստոսի 28-ի դրությամբ Հայաստանի Հանրապետությունը  գտնվում է բարեկեցության պատմականորեն ամենաբարձր կետում: Կառավարության այսօրվա նիստում նման հայտարարությամբ հանդես է եկել վարչապետ Նիկոլ Փաշինյանը:

ՀՀ կառավարության հաղորդագրության համաձայն, նա անդրադարձել է այս տարվա առաջին եռամսյակների գյուղատնտեսական ցուցանիշներին և ընդգծել, որ արդյունքում գյուղատնտեսական արտադրանքի ծավալի առումով աճ է արձանագրվել:

Երկրի ղեկավարն ընդգծել է, որ առաջին 7 ամիսների տվյալներով տնտեսական ակտիվության 7 տոկոսանոց ցուցանիշ է գրանցվել: Ընդ որում՝ տնտեսության հիմնական ճյուղերում բավականին լավ աճի տեմպ է արձանագրվում: «Տնտեսական ակտիվության ցուցանիշը վերջին ամիսների տվյալներով արագացման որոշակի միտումներ է ցուցաբերում, որովհետև հուլիսին ունեցել ենք 9.1 տնտեսական ակտիվության ցուցանիշ: Իհարկե, 7 ամսվա տվյալներով որոշակի մտահոգիչ է մշակող արդյունաբերության թիվը: Բայց այստեղ վերաարտահանման հետ կապված գործընթացներ կան, որոնք փոխվել են, հուլիսին 4.2 տոկոս աճ ունենք արդյունաբերության: Արդյունաբերությունը մեր ամենաթույլ կետերից է եղել ավանդաբար, բայց ես կարծում եմ, որ քաղաքական և տարածաշրջանային պրոցեսները, այդ թվում՝ սպասվող ապաշրջափակումը ՀՀ-ի, արդյունաբերությունը նույնպես պետք է դուրս բերեն նոր որակ և նոր հարթություն»,- ասել է Նիկոլ Փաշինյանը:

Այս առումով, վարչապետն ընդգծել է, որ 2025 թվականի օգոստոսի 28-ի դրությամբ ՀՀ-ն գտնվում է բարեկեցության պատմականորեն ամենաբարձր կետում: «Սա ես չեմ ասում որպես որևէ արտառոց բան, որովհետև հենց մեր ցանկացած զարգացման տրամաբանությունն այն է, որ ամեն հաջորդ տարվա ցանկացած կետում մենք ունենանք մեր բարեկեցության ամենաբարձր աստիճանը»,- ասել է վարչապետը:

Նիկոլ Փաշինյանն արձանագրել է նաև, որ հանրային բարեկեցության տվյալները երևում են նաև բանկային համակարգի տվյալներից: Մասնավորապես, օրինակ՝ ՀՀ ռեզիդենտ համարվող քաղաքացիների բանկային ավանդները և հաշիվները 2017 թվականի համեմատ աճել են 141 տոկոսով. այսինքն՝ խոսքը գումարի մասին է: Ֆիզիկական անձանց դեպքում հաշիվները և ավանդները աճել են 125 տոկոսով, իրավաբանական անձանց դեպքում՝ հաշիվները, շրջանառությունը 175 տոկոսով՝ 2017 թվականի համեմատ: «2017 թվականի համեմատ Հայաստանի ռեզիդենտներին տրված վարկերն աճել են 173 տոկոսով: Այսինքն՝ 2.3 տրիլիոնից դարձել են 6.4 տրիլիոն: Այստեղ կարող է լինել արձագանք, թե մարդիկ վարկի տակ կամ պարտքի տակ են ընկել, բայց դրա համար է, որ կա մյուս ցուցանիշը: Վարկերի պրոբլեմատիկ՝ չաշխատող վարկերի պարագայում մենք գտնվում ենք պատմական մինիմումի վրա: Այսօր մեր վարկերի 1.2 տոկոսն է, որ պրոբլեմատիկ են, ընդ որում՝ 2016 թվականին այդ ցուցանիշը եղել է 4.6 տոկոս: 2024 թվականից, ըստ էության, այդ ցուցանիշը կրկնակի նվազել է և հիմա գտնվում է կայուն ուղեծրի վրա»,-ասել է վարչապետը:

Նիկոլ Փաշինյանը նաև ընդգծել է, որ բանկային համակարգում 2018 թվականից այս կողմ սեփականատերերի իրականացրած ներդրումների ծավալն աճել է շուրջ 162 տոկոսով, ինչը նշանակում է, որ բանկային համակարգը դարձել է այդքանով ավելի հուսալի, և բանկային գործը դարձել է ավելի գրավիչ ՀՀ-ում:

«Գյուղատնտեսություն, տնտեսական ակտիվության ցուցանիշ, բանկային համակարգ. այս ամեն ինչը վկայում է կայուն զարգացման մասին: Սրան գումարվելու և այս ամեն ինչին նոր ազդակ է տալու հաստատված խաղաղությունը: Եվ բոլոր այն նպատակադրումները, որոնք մենք քաղաքական մակարդակում արձանագրում ենք, դառնում են ավելի ու ավելի հասանելի, և այս բոլոր ցուցանիշների հետևում կանգնած են կոնկրետ մարդիկ՝ աշխատող, արդյունք ստեղծող մարդիկ: Ես ուզում եմ բոլոր այդ մարդկանց կրկին շնորհակալություն հայտնել, որովհետև մեր գործն է՝ ստեղծել բավարար, պատշաճ միջավայր և պայմաններ, որպեսզի մարդիկ կարողանան աշխատել և արդյունք ստեղծել և, իհարկե, վճարել օրենքով սահմանված հարկերը, և բոլոր այդպես վարվող մարդկանց ես շնորհակալություն եմ հայտնում»,-ասել է երկրի ղեկավարը:

Անդրադառնալով ստվերային տնտեսությանը՝ վարչապետն ընդգծել է դրա կրճատմանն ուղղված գործիքների կիրառման արդյունավետության կարևորությունը: Ամփոփելով երկրի ղեկավարն ընդգծել է՝ և՛ բանկային համակարգը, և՛ տնտեսությունը պետք է արձանագրեն և նախապատրաստվեն և գիտելիքներ ձեռք բերեն խաղաղության պայմաններում զարգանալու: