«ԴիջիԹեք 2025». Սպասվում է ավելի քան 40 հազար հյուրերի, 100 գլոբալ տեխնոլոգիական առաջատարների և 250 ընկերությունների մասնակցություն

Արմինֆո.  Հայաստանում տարվա գլխավոր տեխնոլոգիական իրադարձությունը՝ «ԴիջիԹեք 2025»-ը, տեղի կունենա Երևանում՝ հոկտեմբերի 10-12-ը, և խոստանում է դառնալ ամենամասշտաբայինը ողջ պատմության ընթացքում: Կազմակերպիչներն ակնկալում են ընդունել ավելի քան 40 000 այցելու և մասնակից՝ 20 երկրներից, որոնց թվում են ավելի քան 100 գլոբալ տեխնոլոգիական առաջնորդներ և 250 ընկերություններ ցուցահանդեսային գոտում:

Այս տարի միջոցառումը կանցկացվի 20-րդ անգամ և միաժամանակ երեք ձևաչափով՝ փառատոն, ցուցահանդես և խորհրդաժողով: Այս տարվա քննարկումների առանցքում արհեստական բանականությունն է, վենչուրային կապիտալը և տեխնոլոգիական ընկերությունների սրընթաց աճը: Կազմակերպիչները խոստանում են հագեցած ծրագիր և ռեկորդային թվով իրադարձություններ հոբելյանական միջոցառման շրջանակներում:

Առաջին հաստատված բանախոսներից են Ռեւ Լեբարեդյանը ՝ NVIDIA-ի փոխնախագահ (ԱՄՆ), Ջեք Մաքքոլին ՝ Oculus-ի համահիմնադիր եւ Բերկլիի համալսարանի պրոֆեսոր (ԱՄՆ), Նուբար Աֆեյանը ՝ Moderna - ի համահիմնադիր եւ նախագահ, Flagship Pioneering - ի հիմնադիր (ԱՄՆ): «Մեզ համար 2025 թվականը առանձնահատուկ տարի է. մենք նշում ենք «Դիջիթեք»-ի 20-ամյակը: Երկու տասնամյակի ընթացքում նախագիծը դարձել է տեխնոլոգիական Հայաստանի գլխավոր խորհրդանիշը։ Այսօր Սա արդեն ոչ թե, պարզապես, ցուցահանդես է, այլ տեխնոլորտի յուրօրինակ "նոր տարի", իրադարձություն, որն ամփոփում է արդյունքները եւ ուղղություն տալիս ապագային", - նշել է «ԴիջիԹեք»-ի տնօրեն Խաչատուր Հակոբյանը։

Առաջատար տեխնոլոգիաների ձեռնարկությունների միության (ԱՏՁՄ) տնօրեն Սարգիս Կարապետյանը հավելել է, որ «ԴիջիԹեք»-ը ԱՍՁՄ-ի առանցքային նախագծերից է: «ԴիջիԹեք 2025-ը կլինի ոչ թե, պարզապես, իրադարձություն, այլ այն կետ, որտեղ կձևավորվի ապագայի քարտեզը։ Մենք հավատում ենք, որ հարթակը կօգնի ամրապնդել Հայաստանի դերը որպես տարածաշրջանային տեխնոլոգիական հանգույց», - ընդգծել է նա։

Նշենք, որ «ԴիջիԹեք»-ի պատմությունը սկսվել է 2005 թվականին։ Դրա հիմնադիրը հայկական տեխնոլոգիական հանրության անվերապահ առաջնորդ, ԱՏՁՄ-ի երկարամյա տնօրեն լուսահոգի Կարեն Վարդանյանն է։

Հավելենք նաև, որ ՀՀ վիճակագրական տվյալների համաձայն, 2025 թվականի առաջին կիսամյակում Հայաստանի տեղեկատվական տեխնոլոգիաների (ՏՏ) ոլորտի հասույթը կազմել է 298.4 մլրդ դրամ, ինչը 25.6%-ով բարձր է նախորդ տարվա ցուցանիշից։