Արմինֆո. Հայաստանի արտարժույթի միջբանկային շուկայում 2025թ.սեպտեմբերի 15-19-ը դոլարային գործարքների ծավալն զգալիորեն աճել է, իսկ ռուբլով գործարքները սկսել են կրճատվել։ Եվրոյով գործարքներ արդեն ավելի քան չորս ամիս չեն իրականացվում ։
Մասնավորապես, դոլարային գործարքների թրենդը 42% անկումից հասել է 2,2 անգամ զգալի աճի, իսկ ռուբլով գործարքների թրենդը շրջվել է հակառակ ուղղությամբ՝ 75% աճից մինչև 22% անկում։ Դա թույլ է տվել դոլարային գործարքների շաբաթական ծավալի գերակայության վերականգնում ռուբլով գործարքների նկատմամբ՝ 1,3 անգամ, այն դեպքում, երբ մեկ շաբաթ առաջ պատկերը հակառակ էր․ ռուբլով գործարքները 2,1 անգամ գերազանցում էին դոլարային գործարքների նկատմամբ։
Դրան զուգահեռ, արտարժույթի ներբանկային շուկայում հաշվետու շաբաթվա ընթացքում (15-19.09.25-ը ' 08-12.09.25-ի համեմատ) դոլարի առքուվաճառքի անկումը պահպանվել է, եվրոյի առքուվաճառքի միտումը ծավալվել է աճից դեպի անկում, իսկ ռուբլով գործարքներում առքի աճն ուղեկցվել է վաճառքի միտման շրջադարձով դեպի անկում։
Արդյունքում՝ ս.թ. սեպտեմբերի 15-19 - ն ընկած ժամանակահատվածում դրամը դոլարի նկատմամբ սկսել է ամրապնդվել' 383,5 - ից մինչև 382,5 դրամ/1դոլար, միաժամանակ շարունակելով թուլանալ եվրոյի նկատմամբ' 449 - ից մինչև 450 դրամ/1եվրո, և տրամադրվելով ռուբլու նկատմամբ արժեզրկման' 4,51-ից մինչև 4,57 դրամ/ 1 ռուբլի: Մեկ տարի առաջ ՝ 2024թ.սեպտեմբերի 19 - ին, դրամի փոխարժեքը դոլարի նկատմամբ կազմել է 386,8 դրամ/1դոլար, եվրոյի նկատմամբ ՝ 431,5 դրամ/1եվրո, իսկ ռուբլու նկատմամբ ՝ 4,17 դրամ/1ռուբլի, ինչը ներկայիս փոխարժեքների համեմատ վկայում է դոլարի նկատմամբ դրամի տարեկան արժևորման և եվրոյի ու ռուբլու նկատմամբ արժեզրկման մասին։
