Արմինֆո.Վերակառուցման եւ զարգացման եվրոպական բանկը (ՎԶԵԲ) Հայաստանին պետական երաշխիքով 39 մլն եվրո վարկ կտրամադրի Երեւանի ծայրամասում նոր մաքսային եւ լոգիստիկ կենտրոնի կառուցման ֆինանսավորման համար: Այդ վարկը կհամալրվի Եվրամիության կողմից 6 մլն եվրո դրամաշնորհով։ Այդ մասին ԱրմԻնֆո-ին հաղորդել է ՎԶԵԲ-ի հայաստանյան գրասենյակի մամուլի ծառայությունը:
Նոր կենտրոնը կփոխարինի մայրաքաղաքում գործող մի քանի առանձին սպասարկման կետերին, ինչը թույլ կտա բարձրացնել արդյունավետությունն ու թափանցիկությունը, բարելավել սպասարկման որակը և կրճատել մաքսազերծման համար անհրաժեշտ ժամանակը: Սկանավորման և վերահսկման բարձրորակ սարքավորումները զգալիորեն կբարձրացնեն արդյունավետությունը և կարագացնեն գործընթացները մաքսային գործառնությունների համար “մեկ պատուհանի” սկզբունքի ներդրման շնորհիվ: Կենտրոնը կամրապնդի տարածաշրջանային կապերը և կնպաստի առևտրի զարգացմանը ՝ ապահովելով տնտեսական աճի առավել մասշտաբային նպատակների իրագործումը:
Կենտրոնը կդառնա նաև Հայաստանում առաջին հասարակական շենքերից մեկը, որը կստանա "կանաչ շենք" սերտիֆիկացում ՝ զգալիորեն բարձրացնելով նրա էներգաարդյունավետությունը: Մաքսային գործառնությունների տեղափոխումը մայրաքաղաքից դուրս և դրանց միավորումը մեկ հարկի տակ կբեռնաթափի տրանսպորտային հոսքը, կբարելավի օդի որակը և մեկ երրորդով կկրճատի բեռնափոխադրումների հետ կապված ջերմոցային գազերի արտանետումները:
Աղբյուրը հիշեցրել է, որ Երևանն առաջին քաղաքներից էր, որ միացել է ՎԶԵԲ-ի "Կանաչ քաղաքներ" ծրագրին: Այդ նախագիծը "Կանաչ քաղաք" գործողությունների ծրագրի (GCAP) շրջանակներում ներդրումների շարունակությունն է: Մաքսային գործառնությունների համախմբումը ժամանակակից, էներգաարդյունավետ կենտրոնում թույլ է տալիս քաղաքին լուծել հիմնական բնապահպանական խնդիրները:
Այս ֆինանսավորումը նաև ԵՄ տնտեսական և ներդրումային ծրագրի շրջանակներում իրականացվող ԵՄ Global Gateway նախաձեռնության առաջատար նախագծերից մեկն է: "Սա ցույց է տալիս Եվրոպական միության հանձնառությունը ռազմավարական ներդրումներին և կայուն զարգացմանը ինչպես Հայաստանում, այնպես էլ տարածաշրջանում", - ասվում է ՎԶԵԲ-ի հաղորդագրության մեջ:
Բացի այդ, ՎԶԵԲ - ի տեխնիկական համագործակցության Թայվանի բիզնես հիմնադրամի (the TaiwanBusiness - EBRD Technical Cooperation Fund) աջակցությամբ կիրականացվի մաքսային վարչարարության ոլորտում թվային ուսուցման ներդրման ազգային ծրագիր, որը կբարձրացնի թվային գրագիտությունը եւ կստեղծի նոր աշխատատեղեր ամբողջ Հայաստանում: Ըստ աղբյուրի ՝ 1992 թվականին Հայաստանում իր գործունեության մեկնարկից ի վեր ՎԶԵԲ-ը ներդրել է ավելի քան 2.5 մլրդ եվրո 231 ծրագրի իրականացման համար:
