Հայաստանում անշարժ գույքին առնչվող որոշ գործարքներ հնարավոր կլինի իրականացնել էլեկտրոնային ձեւաչափով

Արմինֆո.Հայաստանում անշարժ գույքին առնչվող որոշ գործարքներ հնարավոր կլինի իրականացնել էլեկտրոնային ձեւաչափով։ Ազգային ժողովի տնտեսական հարցերի հանձնաժողովը հոկտեմբերի 15-ի նիստում դրական եզրակացություն է տվել "Գույքի նկատմամբ իրավունքների պետական գրանցման մասին" օրենքում առաջին ընթերցմամբ ՀՀ կառավարության ներկայացրած փոփոխություններին:

Ներկայացնելով փոփոխությունները՝ Կադաստրի կոմիտեի նախագահ Սուրեն Թովմասյանը նշել է, որ Կադաստրի կոմիտեում որոշ պայմանագրերի կնքման դեպքում վաճառողն ու գնորդը հնարավորություն կունենան "ես եմ" նույնականացման համակարգի միջոցով կազմված և ստորագրված պայմանագիրը ստորագրել իրենց համակարգիչներից, էլեկտրոնային թվային ստորագրությամբ իրենց հեռախոսներից, իսկ ստորագրելուց հետո պայմանագիրը ներկայացնել իրավունքի պետական գրանցման:

"Այդ աշխատանքների ավարտից հետո համակարգը ավտոմատ կերպով կիրականացնի գնորդի իրավունքների պետական գրանցում և վաճառողի իրավունքների դադարեցում։ Այսինքն, մենք ներդնելու ենք նոր գործիքակազմ, որը կօգնի հեշտացնել գրանցամատյանների աշխատանքային ծավալը, ինչպես նաև կարագացնի անշարժ գույքի նկատմամբ իրավունքների պետական գրանցման գործընթացը", - նշել է Թովմասյանը, հավելելով, որ օրենքում փոփոխությունն իրականացվում է փորձնական կարգով և գործելու է 1,5 տարի։ ՀՀ կադաստրի կոմիտեի տեղեկատվական շտեմարանը հասանելի կդառնա, որպեսզի գործարքներ կատարելուց հետո դրա մասնակիցները անձնական աշխատասենյակների միջոցով կարողանան առցանց հասանելիություն ունենալ տեղեկատվությանը: Ընդ որում, գործարքի մասին պայմանագրում պետք է միայն գնորդի էլեկտրոնային ստորագրությունը։ Գործարքների ձևակերպման ողջ էլեկտրոնային համակարգը կդառնա անվճար։ Դրանք կատարելուց անմիջապես հետո համակարգը ավտոմատ կերպով կստեղծի անշարժ գույքի իրավունք: