Ֆինանսական գրագիտության դաս Idram Junior-ի հետ

Արմինֆո.  Այսօրվա թվային աշխարհում, երբ անկանխիկ վճարումները դարձել են առօրյայի անբաժան մասը, ոչ միայն մեծահասակները, այլ նաև երեխաները ունեն ֆինանսական գրագիտության և անվտանգ անկանխիկ վճարումների կարիք։

Idram-ի նախաձեռնած ֆինանսական գրագիտության հանրահռչակման արշավի շրջանակում ՀՀ տարբեր դպրոցներից մի խումբ երեխաներ այս անգամ այցելեցին ընկերության գրասենյակ՝ ծանոթանալու Idram Junior-ի, ինչպես նաև ֆինանսական գրագիտության հիմունքների հետ։

Երեք տարի առաջ Idram ընկերությունը գործարկեց Հայաստանում առաջին մանկական ֆինանսական հավելվածը՝ Idram Junior-ը: Այն թույլ է տալիս 8-16 տարեկան երեխաներին ունենալ անձնական հաշիվ, կատարել անկանխիկ վճարումներ, խնայել և ամենակարևորը՝ ծնողների վերահսկողության ներքո զարգացնել ֆինանսական գրագիտություն։

Բացի գործնական հնարավորություններից, հավելվածում ներառված են նաև խաղային գործիքներ, որոնք օգնում են երեխաներին հեշտ, հետաքրքիր և ընկալելի ձևով ծանոթանալ ֆինանսական գրագիտության հիմնական սկզբունքներին։ Այդպես հավելվածը դառնում է ոչ միայն օգտակար, այլ նաև ուսուցողական։ Արդեն այս տարվա սեպտեմբերից սկսած՝ դպրոցականների համար հավելվածում անցկացվում են ֆինանսական գրագիտության մրցաշարեր, որոնց հաղթողներին սպասում են արժեքավոր ու հիշարժան մրցանակներ Idram-ի կողմից։