Արմինֆո."Տաշիր Կապիտալ" ընկերությունը հոկտեմբերի 30-ին կրկին դիմելու է ՀՀ Հանրային ծառայությունները կարգավորող հանձնաժողով ՝ բնակչության համար էլեկտրաէներգիայի սակագինը նվազեցնելու պահանջով: Այդ մասին սոցիալական ցանցերում գրել է "Տաշիր Կապիտալ" - ի գլխավոր տնօրեն, "Մեր ձեւով" շարժման համակարգող Նարեկ Կարապետյանը:
"Երեկ իմ հրապարակած տեղեկությանն ի պատասխան, ՀԾԿՀ-ն հայտարարել է, որ մերժել է մեր հունիսի 6-ի առաջարկը, քանի որ ցանկացել է սակագնի վերանայում անել տարեվերջին:
Մեջբերում եմ. «ՀԾԿՀ-ն նպատակահարմար է գտել էլեկտրաէներգետիկական համակարգի ընկերությունների սակագների վերանայումը իրականացնել տարեվերջին»։
Հարգելի՜ հայրենակիցներ, Վաղը մենք մի անգամ էլ կդիմենք ՀԾԿ հանձնաժողով` կցելով նրանց այսօրվա հայտարարությունը և կպահանջենք կատարել մեր գրավոր առաջարկը և իջեցնել էլ. էներգիայի սակագինը (ինչպես իրենք են նշել վերը մեջբերված հայտարարության մեջ): Իջեցրո՛ւ սակագինը պրն. Մեսրոպյան", - գրել է Նարեկ Կարապետյանը:
Հիշեցնենք, որ այսօր ավելի վաղ "Հայաստանի էլեկտրական ցանցեր" ընկերության նախկին ղեկավար Դավիթ Ղազինյանը հաղորդել էր, որ սակագնի նվազեցման հայտը ՀԾԿՀ-ին ուղարկվել է դեռևս հունիսի 6-ին, սակայն մերժում է ստացվել՝ հիմնավորելով, որ այդ հարցին հանձնաժողովը կվերադառնա տարեվերջին: Ղազինյանը նշել է, որ սակագնի իջեցում կարելի է իրականացնել գոյացած 6,3 մլրդ դրամի հավելուրդի հաշվին։
