ՀԿԵ-ն և Հայաստանի զբոսաշրջության ֆեդերացիան համագործակցության մասին հուշագիր են կնքել

Արմինֆո."Հարավկովկասյան երկաթուղի" ընկերությունը և Հայաստանի զբոսաշրջության ֆեդերացիան համագործակցության մասին հուշագիր են կնքել: Նոյեմբերի 5-ին Երևանում փաստաթուղթն ստորագրել են ՀԿԵ տնօրեն Ալեքսեյ Մելնիկովը և Հայաստանի զբոսաշրջության ֆեդերացիայի նախագահ Մեխակ Ապրեսյանը:

Նախքան փաստաթղթի ստորագրումը, կողմերը խոսել են Հայաստանում երկաթուղային զբոսաշրջության զարգացման նոր համատեղ նախաձեռնությունների արդյունքների մասին:

Զբոսաշրջության ֆեդերացիայի նախագահը համոզմունք է հայտնել, որ ՀԿԵ-ի հետ համագործակցությունը կնպաստի Հայաստանում զբոսաշրջության զարգացմանը, մրցունակության բարձրացմանը և այդ ոլորտում տարածաշրջանային փոխգործակցության ընդլայնմանը: Ապրեսյանի խոսքով ՝ դրանք ուղղված են նաև զբոսաշրջային սեզոնի երկարաձգմանը և այն պակաս ակտիվ ժամանակահատվածներում ակտիվացնելուն։

Մելնիկովն, իր հերթին, հիշեցրել է, որ ընթացիկ տարում ՀԿԵ-ն արդեն տեղափոխել է ավելի քան 450 000 ուղևոր, ներառյալ 40 000-ը միջազգային չվերթներում: Մելնիկովը նշել է, որ իրենք ձգտում են ավելացնել ուղևորահոսքը և հարմարավետ պայմաններ ապահովել երկաթուղով ճանապարհորդելու համար: Այդ առնչությամբ նա խոսել է նոր նախաձեռնության մասին, որը թույլ է տալիս շրջագայություններ կազմակերպել երկաթուղով:

"Այս տարի ՀԿԵ-ն իր գործընկերների՝ Gepard Express-ի և վրացի գործընկերների հետ համատեղ մշակել է զբոսաշրջային պրոդուկտ, որը թույլ է տվել 200 եվրոպացի զբոսաշրջիկների երեք օր անցկացնել Հայաստանում և չորս օր՝ Վրաստանում: Այդ ճանապարհորդությունը նրանց թույլ տվեց վայելել երկու երկրների գեղեցկությունը, ընդ որում, երկաթուղային տրանսպորտը կատարում էր անիվների վրա հյուրանոցի գործառույթներ ՝ զբոսաշրջիկներին ազատելով տեղավորման և տեղաշարժի մասին հոգսերից", - ասել է Մելնիկովը: Նա խոսել է ուղևորների շրջանում այդ նոր պրոդուկտի բարձր գնահատականի մասին և վստահություն հայտնել, որ Հայաստանի նկատմամբ հետաքրքրությունը միայն կաճի՝ որպես զբոսաշրջային ուղղություն: ՀԿԵ-ի տնօրենը հաղորդել է նաև այլ ուղղություններով հաամանման երթուղիները կրկնելու ծրագրերի մասին: "Այս նախագծի նկատմամբ հետաքրքրություն են ցուցաբերել, նույնիսկ, Հարավաֆրիկյան Հանրապետության ներկայացուցիչները և "Ռուսական երկաթուղիներ Տուր " - ի գործընկերները", - հավելել է Մելնիկովը: ՀԿԵ տնօրենը պատմել է, որ տվյալ երթուղու իրականացման համար օգտագործվել է վեց ուղևորատար վագոն, ինչը, նրա խոսքով, այս փուլում բավարար է զբոսաշրջիկների հարմարավետ տեղաշարժը կազմակերպելու համար: "Այս տեխնոլոգիան արդեն մշակված է, ինչը թույլ է տալիս տիրաժավորել արտադրանքը մշտական հիմունքներով։ Այդ առնչությամբ մենք մտադիր ենք այդ երթուղիներն իրականացնել տարվա ցանկացած ժամանակ, հաշվի առնելով Հայաստանի կլիման, և դրանցում ներառել նաև գինու տուրեր։ Այս նախաձեռնության շարունակման համար մեզ համար գլխավորը դրանց նկատմամբ պահանջարկն ու հետաքրքրությունն է", - ամփոփել է Մելնիկովը։

Հիշեցնենք, որ "ՀԿԵ" ՓԲԸ-ն "Ռուսական երկաթուղիներ" ԲԲԸ-ի 100% դուստր ընկերությունն է: 2008 թվականի փետրվարի 13-ին Երևանում "Ռուսական երկաթուղիներ" ԲԲԸ-ի և Հայաստանի Հանրապետության միջև ստորագրվել է կոնցեսիոն պայմանագիր հանրապետության երկաթուղային տրանսպորտի համակարգը "ՀԿԵ" ՓԲԸ կառավարմանը հանձնելու մասին: "ՀԿԵ" ՓԲԸ խնդիրների մեջ են մտնում ՀՀ երկաթուղու ենթակառուցվածքի արդիականացումը, Հայաստանին սահմանակից պետությունների հետ համագործակցության զարգացումը, ներհանրապետական և միջազգային ուղևորափոխադրումների և բեռնափոխադրումների զարգացումը: Ընկերության կողմից իրականացվող ներդրումների չափը կազմում է 572 մլն դոլար: