ՌԴ գյուղնախարարություն. Ռուսաստանը հացահատիկի առաջին մատակարարումն է իրականացրել Հայաստան՝ Ադրբեջանի տարածքով անցնող նոր երկաթուղային երթուղով

Արմինֆո.  Ռուսաստանը հացահատիկի առաջին մատակարարումն է իրականացրել Հայաստան ՝ Ադրբեջանի տարածքով նոր երկաթուղային երթուղով: Ըստ "ՌԻԱ Նովոստի"-ի՝ այդ մասին հաղորդել է ՌԴ գյուղնախարարությունը:

"Հայաստան է հասել ռուսական հացահատիկի առաջին խմբաքանակը, որը մատակարարվել է Ադրբեջանի տարածքով նոր երկաթուղային երթուղով", - ասվում է հաղորդագրության մեջ:

Գերատեսչությունում պարզաբանել են, որ Ուլյանովսկի մարզից փոխադրվել է 1000 տոննա երրորդ կարգի ցորեն, որը առաքվել է "Գրեյն Գեյթս"ընկերության կողմից:

Առաքումն իրականացվել է "Ռուսական երկաթուղիներ" ԲԲԸ-ի հետ փոխգործակցությամբ: Ինչպես նշում է ՌԴ գյուղնախարարությունը, այդ ուղղության զարգացումը լրացուցիչ հնարավորություններ է բացում դեպի Հարավային Կովկասի երկրներ արտահանման ծավալների ավելացման համար:

Նախարարությունում պարզաբանել են, որ նախկինում ռուսական արտահանումը Հայաստան, հիմնականում, իրականացվում էր ավտոտրանսպորտային միջոցներով ցամաքային սահմանային անցումով և Վրաստանի նավահանգիստներից՝ ծովով։

"Հայաստանը ներմուծում է տարեկան մոտ 450-500 հազար տոննա հացահատիկ։ Ծավալի գրեթե 100% - ը գալիս է Ռուսաստանից։ Նոր երթուղին ապահովում է տարանցիկ հաղորդակցություն Ադրբեջանի և Վրաստանի տարածքով, ինչը թույլ է տալիս նվազեցնել տրանսպորտային ծախսերը և բարձրացնել մատակարարումների կայունությունը", - նշվում է հաղորդագրության մեջ։

Նախարարությունում նշել են, որ երկաթուղային մատակարարումների վերսկսումը հաջողվել է այն բանից հետո, երբ Ադրբեջանը որոշել է վերացնել դեպի Հայաստան բեռների տեղաշարժի սահմանափակումները. նման պայմանավորվածություններ ձեռք են բերվել այս տարվա հոկտեմբերին Ռուսաստանի, Ադրբեջանի և Հայաստանի կառավարությունների մասնակցությամբ: "Դա բացեց 1990-ականների սկզբից ի վեր առաջին անգամ ռուսական ագրոարդյունաբերական համալիրի արտադրանքի Հայաստան ուղղակի մատակարարումների հնարավորությունը", - ասել են գերատեսչությունում:

Իր հերթին՝ ՌԴ տրանսպորտի նախարարությունը հաղորդել է, որ Ռուսաստանը մինչև 2026 թվականի հունվարի վերջը նախատեսում է Ադրբեջանի տարածքով նոր երկաթուղային երթուղով Հայաստան ուղարկել ևս 132 վագոն ցորեն: "Հացահատիկի առաջին խմբաքանակը Հայաստան է ուղարկվել Ադրբեջանի տարածքով երկաթուղով։ Ռուսական երկաթուղիները կազմակերպել են Ուլյանովսկի մարզի Դիմիտրովգրադ կայարանից ավելի քան 1000 տոննա ցորենի առաքում Հայաստան. մինչև 2026 թվականի հունվարի վերջ այդ երթուղով նախատեսվում է ուղարկել ևս 132 վագոն ցորեն: Մշակվում են նաև այլ կատեգորիաների բեռների մատակարարումներ", - ասվում է հաղորդագրության մեջ ։