Ռուսաստանի և Հայաստանի միջև ուղիղ երկաթուղային հաղորդակցությունը շոշափելի ներդրում է Հարավային Կովկասում խաղաղության հաստատման գործում. Օվերչուկ

Արմինֆո.  Ռուսաստանի և Հայաստանի միջև Ադրբեջանի և Վրաստանի տարածքով ուղիղ երկաթուղային հաղորդակցությունը շոշափելի ներդրում է Հարավային Կովկասում խաղաղության հաստատման գործում, այն ընդգծում է համագործակցության ընդհանուր ձգտումը: Ըստ "ՌԻԱ Նովոստի"-ի՝ այդ մասին լրագրողներին հայտարարել է ՌԴ փոխվարչապետ Ալեքսեյ Օվերչուկը:

Չորեքշաբթի երեկոյան առաջին անգամ Ռուսաստանից Հայաստանի տարածք է ժամանել հացահատիկով բեռնված շարժակազմը, որն անցել է Ադրբեջանով և Վրաստանով։

"Ողջունում ենք Ռուսաստանի Դաշնության և Հայաստանի Հանրապետության միջև Ադրբեջանի Հանրապետության և Վրաստանի տարածքով երկաթուղային հաղորդակցության մեկնարկը: Հայաստանի Հանրապետության անկախացումից ի վեր առաջին անգամ ուղիղ երկաթուղային հաղորդակցություն է իրականացվում մեր երկրների միջև: Այս իրադարձությունն իրական, շոշափելի ներդրում է Հարավային Կովկասում խաղաղության հաստատման գործում, մեր աշխատանքի վկայությունը՝ ի նպաստ տարածաշրջանային կայունության եւ տարածաշրջանի բոլոր երկրների տնտեսական զարգացման", - հայտարարել է Օվերչուկը։

Նա նշել է, որ նոր երթուղին ամրապնդում է Ռուսաստանի տրանսպորտային կապը Հարավային Կովկասի պետությունների հետ,  բարձրացնում Է Հայաստանի շուկաների հասանելիությունը Եվրասիական տնտեսական միության անդամ այլ պետությունների ապրանքների համար, ինչպես նաև բարելավում է ԵԱՏՄ շուկաների հասանելիությունը հայ ապրանքարտադրողների համար:

"Խորհրդանշական է, որ այդ ճանապարհով անցնող առաջին բեռը ռուսական հացահատիկն էր՝ կյանքի եւ արարման կարեւորագույն խորհրդանիշներից մեկը, ինչը եւս մեկ անգամ ընդգծում է Հարավային Կովկասում խաղաղության հաստատման ընդհանուր ձգտումը, առճակատումից անցումը համագործակցության", - ասել է Օվերչուկը:

"Ցանկանում եմ շնորհակալություն հայտնել իմ գործընկերներին՝ Ադրբեջանի Հանրապետության փոխվարչապետ Շահին Մուստաֆաեւին եւ Հայաստանի Հանրապետության փոխվարչապետ Մհեր Գրիգորյանին՝ Հարավային Կովկասի տարածաշրջանում տրանսպորտային կապերի ապաշրջափակման ուղղությամբ համատեղ աշխատանքի, ինչպես նաեւ Վրաստանին՝ այդ երթուղով փոխադրումների կազմակերպմանը կառուցողական մասնակցության համար", - հայտարարել է ՌԴ փոխվարչապետը:

 Նա նշել է, որ Ռուսաստանի Դաշնության և Հայաստանի միջև երկաթուղային հաղորդակցության բացումն ուղղակի հետևանք է ՌԴ նախագահ Վլադիմիր Պուտինի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի միջև ձեռք բերված պայմանավորվածությունների, որոնք ամրագրված են 2020 թվականի նոյեմբերի 9-ի և 2021 թվականի հունվարի 11-ի հայտարարություններում, ինչպես նաև Ադրբեջանի Հանրապետության, Հայաստանի Հանրապետության և Ռուսաստանի Դաշնության փոխվարչապետների համատեղ նախագահությամբ եռակողմ աշխատանքային խմբի ջանքերի: