Արդեն ապահովվել է 2025թ. նախատեսված հարկային մուտքերի և պետական տուրքերի 82%-ը․ ՊԵԿ նախագահ

Արմինֆո.Հոկտեմբեր ամսվա արդյունքներով ապահովվել է 2025 թվականի համար նախատեսված հարկային մուտքերի և պետական տուրքերի 82% - ը ։ Այդ մասին նոյեմբերի 6-ին կառավարության նիստում հայտարարել է ՊԵԿ նախագահ Էդուարդ Հակոբյանը, նշելով, որ հարկային եկամուտների գծով արձանագրվել է 14 տոկոս աճ։

Ինչպես նախօրեին Հակոբյանը նշել էր սոցցանցի իր էջում, հարկային մուտքերն ու պետական տուրքերը հոկտեմբերին աճել են 12,2 տոկոսով։

«2025թ. հոկտեմբերին հարկատուների հետ համատեղ ապահովել ենք 227.6 մլրդ դրամ հարկային մուտքր և պետական տուրքեր, ինչը 24.7 մլրդ դրամով կամ 12.2% - ով ավելի է նախորդ տարվա նույն ամսվա ցուցանիշից:

Հարկային մուտքերի կայուն աճը վկայում է հարկային վարչարարության արդյունավետության և տնտեսական ակտիվության բարձրացման մասին:

Հարկերի բարեխղճորեն վճարումը մեր պետության զարգացման և ապագա սերունդների բարեկեցության ստեղծման հիմնասյուներից մեկն է», - գրել է Հակոբյանը:

Հիշեցնենք, որ 2025 թվականի պետբյուջեի համաձայն, ՀՆԱ աճը կկազմի 5.1%։ Եկամուտները կանխատեսվում են 2 տրլն 873.6 մլրդ դրամ, որից 2 տրլն 720.3 մլրդ դրամը կկազմեն հարկային եկամուտները և պետական տուրքը (2 տրլն 759.9 մլրդ դրամ ՝ սկզբնական տարբերակով): Ծախսերն ակնկալվում են 3 տրլն 441.6 մլրդ դրամի մակարդակում, որից ընթացիկ ծախսերի գծով կհատկացվի 2 տրլն 706.8 մլրդ դրամ: Պակասուրդը կկազմի 604 մլրդ դրամ։ Կապիտալ ծախսերը կհասնեն 734.9 մլրդ դրամի (ՀՆԱ-ի 6.7% - ը) ։ ՀՆԱ - ի դեֆլյատորը սպասվում է 2.5% մակարդակում, իսկ միջին գնաճը՝ 3.6%: