Ներկայացվել է ֆինանսական հանցագործությունների դեմ պայքարի՝ Կոնվերս Բանկի փորձը

Արմինֆո. Կոնվերս Բանկի Ֆինանսական մոնիտորինգի վարչության պետ Զարուհի Ավակիմյանը մասնակցել է Raiffeisen Bank International, ICC Georgia-ի և TBC Bank-ի կողմից կազմակերպված Trusted Banking: Business Resilience Through Compliance համաժողովի շրջանակում անցկացված պանելային քննարկմանը: Նոյեմբերի 6-7-ը Թբիլիսիում կայացած համաժողովը միավորել էր ԵՄ և տարածաշրջանային բանկերի ներկայացուցիչներին՝ քննարկելու համար բանկային ոլորտում զարգացումները, մարտահրավերները և դրանց հաղթահարման հնարավորությունները:

Compliance Policies in the Digital Age պանելային քննարկման շրջանակում Զարուհի Ավակիմյանը խոսել է Կոնվերս Բանկում գործող ֆինանսական հանցագործությունների համապատասխանության համակարգի և տեխնոլոգիական զարգացման մասին՝ շեշտադրելով այս ուղղությամբ Բանկի կողմից վերջին տարիներին կատարված մեծածավալ աշխատանքները, մարդկային և ֆինանսական ներդրումները:

Նա նաև նշել է, որ ֆինանսական հանցագործությունների հակազդման արդյունավետ համակարգը հիմք է հանդիսանում վստահելի բանկային ծառայությունների մատուցման և ֆինանսական կայունության համար: