Հայաստանն ու Վրաստանը քննարկել են կոնյակի իզոտոպային բաղադրության փորձաքննության արդյունքների փոխադարձ ճանաչման հնարավորությունը

Արմինֆո.  ՀՀ էկոնոմիկայի նախարար Գևորգ Պապոյանը Թբիլիսիում հանդիպել է Վրաստանի գյուղատնտեսության և շրջակա միջավայրի նախարար Դավիթ Սոնգուլաշվիլիի հետ։ Հանդիպմանը մասնակցել է նաև նախարարի տեղակալ Արման Խոջոյանը։

ՀՀ էկոնոմիկայի նախարարության հաղորդագրության համաձայն, հանդիպման ընթացքում քննարկվել են Վրաստանի տարածքով հայկական բրենդիով (կոնյակ) բեռնված մեքենաների արագ և անխոչընդոտ անցմանը, կոնյակի իզոտոպային բաղադրության փորձաքննության արդյունքների փոխադարձ ճանաչմանը վերաբերող հարցեր։

Հիշեցնենք, որ ամիսներ շարունակ Հայաստանի կոնյակ արտադրողներն ու արտահանողները ահազանգում էին արհեստական խոչընդոտների մասին, որոնք վրացական կողմը ստեղծում էր հայ արտադրողների համար, որոնք կոնյակ են մատակարարում երրորդ երկրների շուկաներ։ Այդ խմիչքով բեռնված տասնյակ հայկական բեռնատարներ շաբաթներ շարունակ պարապուրդի էին մատնված վրացական մաքսատանը։ Զննման ձգձգումների պատճառով հայ արտահանողները ֆինանսական մեծ վնասներ են կրել։

Առանց որևէ հիմնավորման, պարզաբանման Վրաստանի կարգավորող մարմինների կողմից բացվել էին հայ բեռնափոխադրողների մաքսային կապարակնիքները, վերցվել էին արտադրանքի նմուշներ լաբորատոր փորձաքննության անցկացման համար ՝ առանց դրա համար պատշաճ փաստաթղթեր ներկայացնելու։ Իսկ այդ ուսումնասիրությունների արդյունքները երկար ժամանակ հետաձգվել էին՝ առանց որևէ բացատրության: Վրացական կողմի գործողությունները կարելի էր հասկանալ, եթե հայկական բեռները պետք է մատակարարվեին Վրաստանի շուկա, սակայն այդ երկրի տարածքը միայն տարանցիկ է հայ բեռնափոխադրողների համար, եւ Առեւտրի համաշխարհային կազմակերպության նորմերի համաձայն, ինչպես ավելի վաղ նշել էին արտահանողները, տարանցիկ երկիրն իրավունք չունի պահել բեռները լաբորատոր փորձաքննության անցկացման համար:

Ինչպես հաղորդել է ejc.am-ը, հղում անելով ACSES վերլուծական կենտրոնի տնօրեն Հայկազ Ֆանյանին, հայ - վրացական սահմանով հայկական կոնյակի արտահանման սահմանափակումները բավականին «անհեթեթ» բացատրություն ունեն։ «Ըստ որոշ տվյալների՝ առանձին պաշտոնյաներ ցանկանում են որոշակի վերահսկողություն սահմանել հայկական կոնյակի դիստրիբուցիայի նկատմամբ։ Այսինքն, փոխարեն, որ հայ արտադրողներն իրենք կոնյակ արտահանեն Ռուսաստան Վրաստանի տարածքով, վրացիների կողմից վերահսկվող ընկերությունները գնեն այդ կոնյակը եւ վերաարտահանեն այն ՝ ստանալով որոշակի միջնորդավճար", - նշում էր Ֆանյանը։ Նշենք, որ ըստ ՀՀ վիճակագրական կոմիտեի տվյալների, 2025թ. հունվար-սեպտեմբեր ամիսներին Հայաստանում արտադրվել է 9.5 մլն լիտր կոնյակ, ինչը 34.4%-ով պակաս է նախորդ տարվա ցուցանիշից։