Արմինֆո. Հայաստանում հերթական փորձն է արվում լուծելու սնանկության հետ կապված հարցերը։ Ազգային ժողովի Պետական-իրավական հարցերի հանձնաժողովը մարտի 18-ի նիստում դրական եզրակացություն է տվել ՀՀ կառավարության կողմից առաջին ընթերցմամբ ներկայացված Սնանկության մասին օրենսգրքին եւ հարակից օրենքների մեծ փաթեթին:
Ինչպես նշել է ՀՀ արդարադատության նախարարի տեղակալ Տիգրան Դադունցը՝ առաջին ընթերցմամբ քննարկման ներկայացնելով «Հայաստանի Հանրապետության սնանկության օրենսգիրք» օրենքի նախագիծը, Հայաստանում սնանկության ոլորտը կարգավորվում է 2006 թվականին ընդունված «Սնանկության մասին» օրենքով, որը տարիների ընթացքում ենթարկվել է բազմաթիվ փոփոխությունների: «Սնանկության մասին» օրենքում արդեն իսկ իրականացվել են մի շարք փոփոխություններ, սակայն այն դեռեւս զգալի բարեփոխման կարիք ունի:
Փոխնախարարը նշել է, որ սնանկության ինստիտուտը հաճախ օգտագործվում է որպես պարտքերից անբարեխիղճ կերպով ազատվելու, չարաշահումների, կենսունակ կազմակերպությունների առողջացման փոխարեն նրանց գույքը փոշիացնելու, տարատեսակ եղանակներով գույքերը վաճառելու եւ լուծարման տանելու գործիք:
Տիգրան Դադունցը հայտնել է, որ նշված խնդիրները լուծելու համար էլ մշակվել է օրենսդրական մեծ փաթեթ, որի հիմքում նաեւ մի շարք հետազոտություններ եւ ուսումնասիրություններ են դրված:
ԱԺ հաղորդագրության համաձայն, օրենսգիրքը կարգավորում է իրավաբանական ու ֆիզիկական անձանց սնանկության եւ սնանկության վտանգի հետ կապված հարաբերությունները, ինչպես նաեւ սնանկության գործի վարման եւ դրա շրջանակում առանձին քաղաքացիական գործերի քննության հետ կապված հարաբերություններ:
Փոխնախարարը պատասխանել է պատգամավորների հարցերին, տվել պարզաբանումներ: Հնչել են նաեւ առաջարկներ ու դիտողություններ:
Հանձնաժողովի հավանությանն արժանացած փաթեթը նախատեսվում է ընդգրկել Ազգային ժողովի առաջիկա հերթական նիստերի օրակարգի նախագծում:
