Արմինֆո.Հայաստանի կառավարությունը մարտի 19-ի նիստում հավանություն է տվել «Եվրասիական տնտեսական միությունում ապրանքների էլեկտրոնային առևտրի մասին» համաձայնագրի ստորագրման առաջարկությանը:
Ինչպես ասվում է փաստաթղթի հիմնավորման մեջ համաձայնագրի նախագիծը հավանության է արժանացել Եվրասիական տնտեսական հանձնաժողովի խորհրդի 2025 թվականի դեկտեմբերի 5-ի թիվ 43 կարգադրությամբ և ուղարկվել է անդամ պետություններ՝ ստորագրման համար անհրաժեշտ ներպետական ընթացակարգերն ապահովելու համար։
Համաձայնագրի նպատակն է ապահովել Եվրասիական տնտեսական միության ներքին շուկայի շրջանակներում պատշաճ փոխադարձ էլեկտրոնային առևտուրը, պաշտպանել փոխադարձ էլեկտրոնային առևտրի մասնակիցների իրավունքներն ու իրավական շահերը, ինչպես նաև սահմանել նրանց միջև փոխգործակցության կանոնները։
Համաձայնագրով կարգավորվում է Միության ներքին շուկայում էլեկտրոնային առևտրի մասնակիցների կողմից իրականացվող ձեռնարկատիրական գործունեությունը՝ սպառողներին հեռակա կարգով ապրանքներ առաջարկելու և վաճառելու համար։
Համաձայնագրի հիմնական ուղղություններն են․
- Միության ներքին շուկայում ապրանքների փոխադարձ էլեկտրոնային առևտրի իրականացման պայմանների սահմանում, այդ թվում ապրանքների խտրականության բացառման և ազատ տեղաշարժի, ինչպես նաև էլեկտրոնային առևտրի հետ կապված ծառայությունների մատուցման սկզբունքների կիրառում;
- Էլեկտրոնային առևտրի մասնակիցների իրավունքների և շահերի պաշտպանության սկզբունքներ;
- Միության շրջանակներում էլեկտրոնային առևտրում էլեկտրոնային փաստաթղթաշրջանառության կիրառման, ինչպես նաև տվյալների և տեղեկատվական անվտանգության պաշտպանության ապահովման մոտեցումներ;
- Էլեկտրոնային առևտրում Միության անդամ պետությունների իրավասու մարմինների փոխգործակցության մոտեցումներ։
Համաձայնագրով սահմանվում են նաև Եվրասիական տնտեսական հանձնաժողովի իրավասությունները՝ Միության ներքին շուկայում ապրանքների փոխադարձ էլեկտրոնային առևտրի գործունեության համար անհրաժեշտ ընդհանուր պահանջների և կանոնների ապահովման համար Միության մարմինների ակտերի մշակման և հաստատման մասով։
Համաձայնագիրը նպատակաուղղված է Եվրասիական տնտեսական միության շրջանակներում էլեկտրոնային առևտրի զարգացման համար բարենպաստ պայմանների ստեղծմանը։
