Արմինֆո.ՀՀ էկոնոմիկայի նախարարի տեղակալ Նարեկ Հովակիմյանը մասնակցել է «Աջակցություն որակի ենթակառուցվածքին Հայաստանում» ծրագրի փակման միջոցառմանը:
ԵՄ ֆինանսավորմամբ իրականացվող «Աջակցություն Հայաստանում որակի ենթակառուցվածքին» ծրագրով ՄԱԿ-ի Արդյունաբերական զարգացման կազմակերպությունը (UNIDO) 2022 թվականից աջակցում է Հայաստանի Հանրապետության կառավարությանը չափագիտության համակարգի արդիականացման և միջազգային չափանիշներին համապատասխանեցման ուղղությամբ։ Ներդրումների ծավալը կազմել է 4,1 մլն եվրո:
Ծրագրի ընթացքում, ինչպես նշել է Հովակիմյանը, իրականացվել է լայնածավալ աշխատանք․ ստեղծվել են չորս նոր, ժամանակակից տրամաչափարկման լաբորատորիաներ՝ յոթ ուղղություններով, որոնցից երեքը ԵՄ ֆինանսավորմամբ ստացել են միջազգային ճանաչում։ «Դա հնարավորություն է տալիս չափիչ սարքավորումների ստուգումն ու ճշգրտումը իրականացնել տեղում՝ միջազգային չափանիշներին համապատասխան՝ առանց դրանք արտերկիր ուղարկելու՝ զգալիորեն խնայելով ժամանակն ու ռեսուրսները», - նշել է փոխնախարարը։
Նշենք, որ UNIDO - ն ՄԱԿ համակարգի մասնագիտացված կառույց է, որն աջակցում է կայուն արդյունաբերական զարգացմանը, տնտեսության մրցունակության բարձրացմանը և նորարարությունների ներդրմանը:
Հայաստանում UNIDO-ն գործում է 1990-ականների սկզբից, իրականացնելով ծրագրեր, որոնք ուղղված են արդյունաբերության զարգացմանը, փոքր և միջին բիզնեսին աջակցմանը, էներգաարդյունավետության բարձրացմանը, էկոլոգիապես մաքուր տեխնոլոգիաների ներդրմանը և որակի ենթակառուցվածքի զարգացմանը: Կազմակերպությունը տեխնիկական աջակցություն է ցուցաբերում պետական մարմիններին և մասնավոր հատվածին, այդ թվում ՝ արտադրանքի ստանդարտացման, չափագիտության և սերտիֆիկացման ոլորտներում:
Համագործակցության առանցքային ուղղություններից է տեխնիկական կարգավորման համակարգի արդիականացումը և միջազգային չափորոշիչներին դրա համապատասխանեցումը, ինչը նպաստում է երկրի արտահանման հնարավորությունների ընդլայնմանը և համաշխարհային շուկաներին ինտեգրմանը:
