Արմինֆո.ՀՀ ֆինանսների նախարար Վահե Հովհաննիսյանի ղեկավարությամբ տեղի է ունեցել Արժույթի միջազգային հիմնադրամի (ԱՄՀ) հայաստանյան առաքելության ամփոփիչ հանդիպումը՝ առաքելության ղեկավար Ալեքսանդր Ֆերենց Թիմանի գլխավորած պատվիրակության մասնակցությամբ։
Ֆինանսների նախարարության հաղորդագրության համաձայն, Վահե Հովհաննիսյանը բարձր է գնահատել երկշաբաթյա առաքելության շրջանակում իրականացված արդյունավետ և կառուցողական աշխատանքը՝ ընդգծելով, որ քննարկումները և փոխգործակցությունը կարևոր նշանակություն ունեն Հայաստանի մակրոտնտեսական կայունության ամրապնդման, ինչպես նաև կառուցվածքային բարեփոխումների հետևողական առաջմղման տեսանկյունից։
Հանդիպման ընթացքում անդրադարձ է կատարվել Հայաստանի Հանրապետության և ԱՄՀ-ի միջև տնտեսական և ֆինանսական քաղաքականությունների հուշագրի (MEFP) նախագծին՝ ըստ առանձին ուղղությունների։ Քննարկվել է նաև ԱՄՀ-ի կողմից սահմանված կառուցվածքային հենանիշների կատարման ընթացքը և դրանց բավարար առաջընթացը։
Կողմերը շնորհակալություն են հայտնել միմյանց ակտիվ և բովանդակային երկխոսության համար՝ նշելով, որ առաքելության ընթացքում քննարկված հարցերի լայն շրջանակը և արձանագրված առաջընթացը նպաստում են երկկողմ համագործակցության հետագա խորացմանը։
Հանդիպման ավարտին կողմերը վերահաստատել են շարունակական և արդյունավետ համագործակցության իրենց պատրաստակամությունը։
Հիշեցնենք, որ 2025 թվականի դեկտեմբերի սկզբին Արժույթի միջազգային հիմնադրամի (ԱՄՀ) գործադիր խորհուրդը հաստատել է Հայաստանի հետ SBA (Stand-By Arrangement) եռամյա նոր համաձայնագիրը stand-by պահուստային վարկի վերաբերյալ ՝ 128.8 միլիոն SDR կամ մոտ 175 միլիոն դոլար ընդհանուր գումարով (ԱՄՀ-ում Հայաստանի քվոտայի 100% - ը): Միաժամանակ, ԱՄՀ-ն ավարտել է նախորդ վեցերորդ ամփոփումը SBA համաձայնագրի շրջանակում, որի գործողության ժամկետը լրանում էր 2025թ. դեկտեմբերի 11-ին: ԱՄՀ-ի տնօրենների խորհրդի կողմից նոր SBA-ի հաստատումից հետո Հայաստանին անմիջապես հասանելի կդառնա 18.4 մլն SDR-ին (մոտ 25 մլն դոլար) համարժեք գումար: Մնացած գումարը կտրամադրվի հավասար տրանշերով՝ հաշվի առնելով վեց կիսամյակային վերանայումները։ SBA-ի նոր համաձայնագիրը, որը Հայաստանի իշխանությունների կողմից դիտարկվում է որպես կանխարգելիչ, ուղղված է մակրոտնտեսական կայունության պահպանման, կայուն և ներառական աճի խթանման, ինչպես նաև անորոշության պայմաններում անկման ռիսկերից պաշտպանության ապահովման նպատակով պետական քաղաքականության և կառուցվածքային բարեփոխումների ծրագրի շարունակականության ապահովմանը:
