Արմինֆո. ՀՀ կառավարությունը հինգ տարվա ընթացքում 25 մլն դոլար կուղղի բարձրարտադրողական հաշվողական ռեսուրսների ձեռք բերման համար։ Այդ մասին որոշումն ընդունվել է կառավարության ապրիլի 9-ի նիստում։
Որոշման նախագծի հիմնավորման մեջ նշվում է, որ այսօր արհեստական բանականությունը դարձել է ոչ միայն տեխնոլոգիական, այլև տնտեսական և պետական կառավարման զարգացման գլխավոր շարժիչ ուժերից մեկը: Այն երկրները, որոնք ունեն բավարար հաշվողական հզորություն, ձևավորում են ապագան, իսկ մյուսները դառնում են այդ լուծումների սպառողներ։ Հայաստանի Հանրապետությունը պետք է ընտրի առաջին ճանապարհը ։ Նպատակն է Հայաստանում ձևավորել հաշվողական ենթակառուցվածք, որն ապահովի գիտության, կրթության և բիզնեսի զարգացումը, նպաստի պետական համակարգի թվայնացմանը և Հայաստանը դիրքավորի որպես տարածաշրջանային տեխնոլոգիական կենտրոն:
Ի դեպ, ինչպես ընդգծվում է հիմնավորման մեջ, ներկայումս կան մի շարք սահմանափակումներ ։ Երկիրը չունի բավարար GPU հաշվողական հզորություններ, ԱԲ բնագավառի նախագծերը կախված են արտաքին հարթակներից, և դրանց բարձր արժեքի պատճառով այդ ռեսուրսները հաճախ անհասանելի են: Արդյունքում՝ հետազոտությունների անցկացումը սահմանափակ է, ստարտափները չեն կարող մրցունակ զարգանալ, իսկ ԱԲ ոլորտում պետական ծրագրերը դժվար է մասշտաբավորել: Այդ խնդրի լուծման համար առաջարկվում է ձեռք բերել մոտ 25 մլն դոլարի բարձրարտադրողական հաշվողական ռեսուրսներ։ Դա հնարավորություն կտա ուսանողներին և գիտնականներին աշխատել ժամանակակից ԱԲ գործիքներով, խթանել հետազոտությունները և ներգրավվել միջազգային նախագծերում: Տեխնոլոգիական հատվածում դա թույլ կտա աջակցել ստարտափներին, նվազեցնել դրանց ծախսերը և խթանել բարձր եկամտաբերության պրոդուկտների զարգացումը:
ՀՀ կառավարությունն արդեն հաստատել է ԱԲ բնագավառում բարձրարտդրողական հաշվողական ռեսուրսների հասանելիության ապահովմանը պետական աջակցության պիլոտային ծրագիրը, որը նպատակաուղղված է ԱԲ էկոհամակարգի, կրթական և հետազոտական միջավայրի ձևավորմանը, ինչպես նաև պետական և մասնավոր հատվածների համար կիրառական լուծումների ստեղծմանն աջակցությանը: Ներկայումս այդ ռեսուրսները ձեռք են բերվում Amazon Web Services-ից, սակայն նախատեսվում է, որ 2027 թվականից դրանք կտրամադրվեն Հայաստանի Հանրապետությունում գործող ԱԲ տվյալների կենտրոնից:
Միաժամանակ նախատեսվում է ստեղծել ԱԲ զանգերի կենտրոն ողջ պետական համակարգի համար, որը կապահովի քաղաքացիների դիմումների ավտոմատ մշակումը, ձայնային ծառայությունները և շուրջօրյա հասանելիություն: Սա էապես կբարձրացնի պետական կառավարման արդյունավետությունը և կօպտիմալացնիւ ռեսուրսները։
Առաջադրված խնդրի լուծման համար գնումները կիրականացվեն մեկ անձից, տվյալ դեպքում ՝ "Firebird AI" ՓԲԸ-ից ՝ երկրում իրականացվող արհեստական բանականության ռազմավարական ֆաբրիկայի ստեղծման ծրագրի շրջանակներում: Նախագիծը, մասնավորապես, հնարավորություն է ընձեռում ձեռք բերել առաջատար գրաֆիկական պրոցեսորներ Հայաստանի Հանրապետությունում դրանց արտադրությամբ զբաղվող ընկերությունից ՝ պետական հատվածում տեխնոլոգիական առաջընթացին նպաստելու նպատակով:
