Արմինֆո.Երևանում տեղի է ունեցել «Hospitality Investment Forum Yerevan 2026» (HIF) միջազգային ներդրումային ֆորումի պաշտոնական բացումը, որը համախմբել է ավելի քան 1000 մասնակցի աշխարհի ավելի քան 28 երկրներից։
Ֆորումը բացել է ՀՀ էկոնոմիկայի նախարար Գևորգ Պապոյանը՝ ընդգծելով, որ այս միջոցառումը կարևոր հարթակ է նոր ներդրումային նախաձեռնությունների մեկնարկի, գործընկերային կապերի ձևավորման և երկարատև համագործակցության զարգացման համար։
Նա նկատել է, որ անվտանգ միջավայրը, բնությունը, բնակարանային բազմաթիվ ռեսուրսները և զարգացած ծառայությունների ոլորտը մրցակցային առավելություններ են ստեղծում ու բարձրացնում մեր երկրի գրավչությունը ինչպես զբոսաշրջիկների, այնպես էլ ներդրողների համար։
Պապոյանը նշել է, որ այս դրական միտումներն արտացոլվում են նաև վիճակագրության մեջ։ Նախարարը հիշեցրել է, որ 2026 թվականի 5 ամիսների ընթացքում երկիր է այցելել շուրջ 825 հազար զբոսաշրջիկ։
Միևնույն ժամանակ, նրա խոսքով, կառավարությունն ակտիվորեն համագործակցում է միջազգային և տարածաշրջանային ավիաընկերությունների հետ՝ նոր չվերթեր գործարկելու նպատակով։ «Հասանելիությունը հիմնական շարժիչ ուժն է՝ ինչպես ներդրումային ակտիվության, այնպես էլ զբոսաշրջային հոսքերի տեսանկյունից»,- ընդգծել է էկոնոմիկայի նախարարության ղեկավարը։
Նկատելով, որ կառավարության համար զբոսաշրջության զարգացումը տնտեսական քաղաքականության առաջնահերթություն է՝ Պապոյանը հայտնել է, որ իշխանությունները ոլորտային բիզնեսի համար գործարկել են մի շարք օժանդակող ծրագրեր։ Որպես օրինակ նա ներկայացրել է հյուրանոցային սեկտորի աջակցության ծրագիրը, որի շրջանակներում նախատեսված է վարկերի տոկոսադրույքների սուբսիդավորում՝ սարքավորումների ձեռքբերման, բիզնես գործընթացների թվայնացման, խորհրդատվական ծառայությունների ստացման, ինչպես նաև կապիտալ շինարարության նախագծերի իրականացման համար։
Դրան զուգահեռ, նա պատմել է, որ կառավարությունը զգալի ներդրումներ է ուղղում մարզային ենթակառուցվածքների զարգացմանը, ընդլայնում է այնտեղի ճանապարհային ցանցը, արդիականացնում է զբոսաշրջային կենտրոնները և ստեղծում նոր զբոսաշրջային ծառայություններ։
Այս համատեքստում նախարարը հիշատակել է երկրի տարածաշրջաններում զբոսաշրջային կլաստերների ստեղծման խոշոր նախագիծը, որի իրականացման համար նախատեսված է ավելի քան 120 միլիոն եվրո։
Նշենք, որ HIF-ն անցկացվում է արդեն չորրորդ անգամ և համախմբում է համաշխարհային առաջատար հյուրանոցային բրենդների ներկայացուցիչներին, ներդրողներին, կառուցապատողներին ու պետական կառույցներին՝ Հայաստանում և տարածաշրջանում նոր նախագծերի մեկնարկի, ներդրումների ներգրավման և երկարաժամկետ գործընկերությունների ձևավորման համար։
Միջոցառումը կողմնորոշված է ռեալ նախագծերի իրականացմանը, գործընկերությունների հաստատմանը և ներդրումների ներգրավմանը։ 2024 թվականի երևանյան ֆորումի արդյունքներով ստորագրվել էին երկու ներդրումային համաձայնագրեր, իսկ 2025 թվականի միջոցառումը համախմբել էր հազարավոր մասնակիցների ողջ աշխարհից։
Զբոսաշրջության կոմիտեի տվյալների համաձայն՝ հունվար-մայիս ամիսներին Հայաստան է այցելել 825.4 հազար զբոսաշրջիկ, ինչը 19,3%-ով գերազանցում է նախորդ տարվա նույն ժամանակահատվածի ցուցանիշը։
Ինչպես հայտնում է Հայաստանի զբոսաշրջության կոմիտեն, միայն մայիսին զբոսաշրջիկների թիվը հասել է շուրջ 200 հազարի։ Ընթացիկ տարվա ապրիլի համեմատ գրանցվել է 15,5% աճ, իսկ 2025 թվականի մայիսի համեմատ՝ 9,9% աճ։
Այն երկրների լավագույն եռյակում (TOP-3), որոնց քաղաքացիներն ամենից հաճախ են ընտրում Հայաստանը հանգստի համար, անփոփոխ կերպով ներառված են Ռուսաստանը, Վրաստանը և Իրանը։
