Արմինֆո. Հայաստանում տոհմային անասնաբուծության զարգացումը կամրագրվի օրենսդրական մակարդակով։ ՀՀ Ազգային ժողովը հունիսի 18-ի լիագումար նիստում առաջին ընթերցմամբ փոփոխություններ է կատարել "Տոհմային անասնաբուծության մասին" օրենքում:
Ներկայացնելով փոփոխություններն ու լրացումները ՝ ՀՀ էկոնոմիկայի նախարարի տեղակալ Տաթևիկ Սարգսյանը նշել է, որ ներկայումս բացակայում է տոհմային անասնաբուծության ոլորտը կարգավորող նորմատիվ իրավական ակտը, որն օրենսդրական մակարդակով կկարգավորի պետական աջակցության քաղաքականության մշակման և նպատակային ծրագրերի իրականացման համար նախատեսված պահանջները: Նշված իրավական բացերի արդյունքում տոհմային անասնաբուծության ոլորտում լիազորված մարմինները հաճախ ստիպված են լինում դժվարություններ հաղթահարել իրենց լիազորություններն իրականացնելիս:
Ինչպես նշել է փոխնախարարը, նախագծով առաջարկվում է հստակեցնել "տոհմային կենդանիների պետական ռեեստր" եւ "տոհմային անասնաբուծական տնտեսություն" հասկացությունները, տոհմային անասնաբուծության ոլորտում գործունեություն իրականացնող անձանց լիազորություններն ու պարտականությունները, ինչպես նաեւ տոհմային կենդանիների պետական գրանցման կարգը, տոհմային տնտեսություններին ներկայացվող պահանջները, տնտեսություններին տոհմային կարգավիճակի վկայականների տրամադրման ձեւը եւ կարգը ՝ դրանով իսկ ապահովելով տոհմային անասնաբուծության ոլորտի կարգավորումը:
"Նախագծի կիրառման արդյունքում կկարգավորվեն տոհմային անասնաբուծության ոլորտում քաղաքականության մշակման հիմքերը, ինչպես նաև կհստակեցվեն տոհմային անասնաբուծական տնտեսությունների գործունեության տեսակներն ու սկզբունքները, մասնավորապես, տոհմային կենդանիների պետական գրանցման և հաշվառման, ինչպես նաև ֆերմերային տնտեսություններին կարգավիճակի շնորհման միջոցով բարենպաստ պայմաններ կստեղծվեն կառավարության լիազոր մարմնի կողմից ժամանակակից տվյալների վրա հիմնված քաղաքականության մշակման համար: Նշված իրավական կարգավորումը թույլ կտա ոչ միայն բարձրացնել տոհմային անասունների բուծման գործունեության արդյունավետությունը, այլև ապահովել դրա օրինականությունը", - հավելել է էկոնոմիկայի փոխնախարարը։
