Արմինֆո.Ավտոմոբիլային ճանապարհների ապաշրջափակումը կարող է մեծ հետաքրքրություն առաջացնել միջազգային ներդրողների շրջանում։ Այս մասին հուլիսի 2-ին կայացած ճեպազրույցի ժամանակ հայտարարել է ՀՀ վարչապետ Նիկոլ Փաշինյանը։
Նրա խոսքով՝ այս ուղղությամբ որոշիչ գործոն կդառնա Թուրքիայի կողմից ավտոմոբիլային ճանապարհների ապաշրջափակումը։ Այդ դեպքում Հայաստանում կարող են հայտնվել վճարովի ավտոճանապարհներ բեռնատար տրանսպորտի համար։ Դրա համար կպահանջվի ընդամենը ճանապարհի մի փոքր հատված կառուցել Ախուրիկում։
Մյուս կողմից, ինչպես նշել է վարչապետը, ամերիկացի գործընկերների հետ իրականացվում է TRIPP նախագիծը։ Ընդհանուր առմամբ, երկրի հյուսիսային շրջաններով հեռանկարային լոգիստիկ երթուղիների իրականացման հարցում Երևանն հենվում է Վաշինգտոնի հետ ռազմավարական գործընկերության վրա, մինչդեռ Բրյուսելն ուղղակի կապ չունի այս նախաձեռնության հետ։ Կառավարության ղեկավարը կոչ է արել հստակորեն տարանջատել միջազգային լոգիստիկ ուղիները և պարզաբանել է, որ տվյալ երթուղով Հայաստանը բանակցություններ է վարում այլ աշխարհաքաղաքական ուժի հետ, իսկ բուն գաղափարն ունակ է արմատապես փոխել տարածաշրջանի տարանցիկ ներուժը։ «Ես դեռ նախընտրական շրջանում բազմիցս ասել եմ, որ հետազոտությունները վեր հանեցին Արևելքի և Արևմուտքի միջև ամենակարճ ճանապարհը, որն անցնում է հենց Հայաստանի տարածքով, մասնավորապես՝ Տավուշի, Լոռու և Շիրակի մարզերով։ Այս ծրագրի իրականացման ամենապարզ մեթոդը Ղազախ - Իջևան, Վանաձոր, Գյումրի, Ախուրիկ ավտոմոբիլային ճանապարհների բացումն է միջազգային բեռնափոխադրումների համար՝ վճարովի հիմունքներով։ Սա շատ հեշտ իրագործելի նախագիծ է, որի համար անհրաժեշտ են քաղաքական պայմանավորվածություններ և սահմանների բացում։ Նման ծրագիրը կարող է հսկայական տարածաշրջանային հետաքրքրություն ներկայացնել։ Իհարկե, Ախուրիկում մեզնից կպահանջվի ճանապարհի մի փոքր հատված կառուցել, բայց դա միանգամայն իրագործելի է։ Ինչ վերաբերում է TRIPP նախագծին, ապա մենք այն առաջ ենք մղում ԱՄՆ-ի հետ, և Եվրոպական միության կոնկրետ ներգրավվածություն այստեղ չկա։ Ես այնքան էլ չեմ հասկանում, թե ինչու պետք է Բրյուսելն այնտեղ մասնակցի, եթե մենք արդեն իսկ ծրագիրն իրականացնում ենք ամերիկյան կողմի հետ, թեև ԵՄ դիրքորոշումն այս հարցում, անշուշտ, դրական է»,- ընդգծել է Փաշինյանը։
