Արմինֆո. Հայաստանի քաղաքացիներն այսուհետ կարող են այլ անձի լիազորել իրենց փոխարեն եկամուտների հայտարարագիրը լրացնելու և ներկայացնելու համար: Այդ մասին հաղորդում է Պետական եկամուտների կոմիտեի մամուլի ծառայությունը:
Ինչպես պարզաբանել է ՊԵԿ աշխատակից Սոնա Աղաջանյանը, լիազորված անձը կարող է հայտարարատուի անունից մուտք գործել համակարգ, ներկայացնել հայտարարագիր և կատարել այլ անհրաժեշտ գործողություններ, մասնավորապես, լրացնել սոցիալական ծախսերի մասին դիմում և այլն:
Նրա խոսքով՝ Ֆիզիկական անձանց համար էլեկտրոնային ծառայությունների միասնական համակարգի վեբ-տարբերակում արդեն ստեղծվել է համապատասխան բաժին՝ լիազորությունների ձևակերպման համար:
Աղաջանյանը նշել է, որ ընթացակարգը բավականին պարզ է։ Հայտարարատուն իր էջում նշում է լիազորված անձի տվյալները, որից հետո վերջինս իր էջում հաստատում կամ մերժում է հարցումը: Անհրաժեշտության դեպքում հայտարարատուն կարող է սահմանել նաև լիազորությունների գործողության ժամկետ:
Բացի այդ, այս բոլոր ընթացակարգերը կատարելու համար հայտարարատուն կարող է անձամբ դիմել Պետական եկամուտների կոմիտե՝ տրամադրելով բոլոր անհրաժեշտ տեղեկությունները: Միևնույն ժամանակ, կարևոր է հաշվի առնել, որ, եթե հայտարարատուի համար էլեկտրոնային ստորագրության առկայությունը պարտադիր չէ, ապա լիազորված անձի համար դա պարտադիր է:
