ԱրմԻնֆո. Նախարար Գևորգ Պապոյանը Դուբայում հանդիպել է Արաբական Միացյալ Էմիրությունների էկոնոմիկայի և զբոսաշրջության նախարար Աբդուլլահ բին Թուք Ալ Մարրիի հետ։
Հանդիպման ընթացքում կողմերը քննարկել են Հայաստանի և ԱՄԷ-ի միջև տնտեսական համագործակցության լայն օրակարգ, մասնավորապես՝ Հայաստանում արտադրական և տարածաշրջանային բաշխման կենտրոններ հիմնելու, համատեղ լոգիստիկ կենտրոններ զարգացնելու, ինչպես նաև հայկական գյուղատնտեսական արտադրանքի վերամշակման և ԱՄԷ ընկերությունների համար մասնավոր ապրանքանիշի արտադրության կազմակերպման հնարավորությունները։
Կողմերը նաև անդրադարձել են կանաչ ջրածնի արտադրության և վերականգնվող էներգիայի ոլորտներում համագործակցության հեռանկարներին։
Նախարարները մտքեր են փոխանակել զբոսաշրջության, հյուրընկալության և ներդրումների ոլորտում համագործակցության խորացման վերաբերյալ։
Վիճակագրական կոմիտեի տվյալներով՝ Հայաստանի և ԱՄԷ-ի միջև առևտրաշրջանառությունը հունվար-հուլիս ամիսներին նվազել է 72.1%-ով՝ կազմելով 356.5 միլիոն դոլար։ Արտահանումը նվազել է 73.7%-ով՝ հասնելով 325.4 միլիոն դոլարի, իսկ ներմուծումը նվազել է 29.4%-ով՝ հասնելով 31.1 միլիոն դոլարի։
2026 թվականի առաջին կեսին ԱՄԷ-ից Հայաստան է այցելել 1837 զբոսաշրջիկ, ինչը 56.9%-ով պակաս է նախորդ տարվա նույն ժամանակահատվածի համեմատ։
