Արմինֆո: Հոկտեմբերի 1-ին հայ-իրանական սահմանի Նորդուզի սահմանային անցակետում տեղի է ունեցել Հայաստանի Հանրապետության և Իրանի Իսլամական Հանրապետության միջև միջգերատեսչական հանդիպում:
ՀՀ տարածքային կառավարման և ենթակառուցվածքների նախարարության մամուլի ծառայության հաղորդմամբ, հանդիպումը վարել են ՏԿԱԻ փոխնախարար Քրիստինե Ղալեչյանը և Իրանի Իսլամական Հանրապետության ճանապարհների և քաղաքաշինության փոխնախարար Ռեզա Աքբարին:
Կողմերը քննարկել են սահմանային ենթակառուցվածքների արդիականացման և բեռնափոխադրումների ծավալների ավելացման մեխանիզմները:
Փոխնախարարները գործնական համաձայնության են եկել երկկողմ բեռնափոխադրումների ոլորտում առկա խոչընդոտները լուծելու վերաբերյալ: Հանդիպումից հետո հայկական պատվիրակությունը մասնակցել է Նորդուզի սահմանային անցակետի վերակառուցման նախագծի հիմնարկեքի արարողությանը:
Միևնույն ժամանակ, ինչպես հաղորդում է IRNA-ն, բանակցությունները կենտրոնացած են եղել երկրների միջև հիմնական տարանցիկ ուղու երկայնքով լոգիստիկ կարողությունների զարգացման և ենթակառուցվածքային խոչընդոտների վերացման վրա: Կողմերը համաձայնության եկան կրճատել մաքսային ձևակերպումների ժամանակը, բարելավել սահմանային անցման արդյունավետությունը և արդիականացնել սահմանային լոգիստիկան։
Նորդուզի սահմանային տերմինալը Իրանի և Հայաստանի միջև առևտրային հարաբերությունների կարևորագույն օղակ է, որն ունի տարածաշրջանային բեռնափոխադրումների ավելացման մեծ ներուժ։
