Արմինֆո. Ակնկալվում է, որ "Ամուլսար" ոսկու հանքից կարդյունահանվի տարեկան մոտ 210 000 ունցիա ոսկի: Այդ մասին հաղորդվել է ՀՀ վարչապետ Նիկոլ Փաշինյանի մասնակցությամբ նախագծի մեկնարկի արարողության ժամանակ:
Մասնագետների գնահատմամբ՝ հանքի շահագործման արդյունքում "Լիդիան Արմենիայի" կողմից պետական բյուջե վճարվող տարեկան հարկերն ու մասհանումները կկազմեն մոտ 130 մլն ԱՄՆ դոլար, ինչը դրական ազդեցություն կունենա Հայաստանի ՀՆԱ-ի վրա՝ 1,5-2% - ի չափով:
Ակնկալվում է, որ "Ամուլսար" նախագիծը կապահովի ավելի քան 4000 ուղղակի և անուղղակի աշխատատեղ: Կառավարության, "Լիդիան Արմենիա" ընկերության և Ջերմուկ, Վայք և Սիսիան համայնքների միջև ստորագրված համայնքների զարգացման համաձայնագրով նախատեսվում է տարեկան 7-9 մլն ԱՄՆ դոլար հատկացնել հանքի շահագործման ողջ ընթացքում համայնքների սոցիալ-տնտեսական զարգացման ծրագրերին:
Նախագիծն իրականացվում է "Լիդիան Արմենիա" ընկերության և ՀՀ կառավարության միջև ռազմավարական համագործակցության շրջանակներում: Ընկերությունն, ընդհանուր առմամբ, շուրջ 750 մլն ԱՄՆ դոլարի ներդրում է կատարել նախագծում, որից 150 մլն ԱՄՆ դոլարն ապահովված է ՀՀ կառավարության կողմից տրված պետական երաշխիքով:
