Արմինֆո.ՀՀ բարձր տեխնոլոգիական արդյունաբերության և արհեստական բանականության նախարարի տեղակալ Գևորգ Մանթաշյանն ընդունել է Իտալիայի պետական վերահսկողության ներքո գործող զարգացման ֆինանսական հաստատության՝ Cassa Depositi e Prestiti (CDP) ներկայացուցիչ Լուչիա Բոնելիին և Հայաստանում Իտալիայի փոխդեսպան Անդրեա Պեդուտոյին։
ՀՀ բարձր տեխնոլոգիական արդյունաբերության և արհեստական բանականության նախարարության հաղորդագրության համաձայն, հանդիպման ընթացքում քննարկվել են բարձր տեխնոլոգիաների ոլորտում համագործակցության ընդլայնման, ինչպես նաև պետական աջակցության շրջանակում հնարավոր ֆինանսական և ներդրումային մեխանիզմների կիրառման հեռանկարները։
Կողմերը կարևորել են ստարտափ էկոհամակարգի զարգացումը, կիբեռանվտանգության ամրապնդումը և թվային ենթակառուցվածքների կատարելագործումը։ Անդրադարձ է կատարվել հայկական տեխնոլոգիական ընկերությունների ներուժին, միջազգային գործընկերների հետ գործարար կապերի ընդլայնմանն ու համատեղ ծրագրերի իրականացման հնարավորություններին։
Քննարկվել են նաև տվյալների կենտրոնների կառավարման, ամպային տեխնոլոգիաների կիրառման և պետական-մասնավոր գործընկերության շրջանակում թվային ենթակառուցվածքների զարգացման ուղղություններով համագործակցության հնարավորությունները։
Անդրադարձ է կատարվել նաև արդյունաբերության տարբեր ճյուղերում տեխնոլոգիական արդիականացման, արտադրողականության բարձրացման և նորարարական լուծումների ներդրման հնարավորություններին։
Քննարկվել են նաև իտալական ընկերությունների հետ գործընկերության հնարավոր ձևաչափերը և գործարար կապերի ընդլայնման հեռանկարները։
Հանդիպման ավարտին Լուչիա Բոնելին վերահաստատել է Հայաստանի բարձր տեխնոլոգիական ոլորտի հետ երկարաժամկետ ռազմավարական համագործակցություն զարգացնելու պատրաստակամությունը։ Կողմերը պայմանավորվել են շարունակել քննարկումները՝ փոխադարձ հետաքրքրություն ներկայացնող ծրագրեր մշակելու և իրականացնելու նպատակով։
