Արմինֆո. ԱՄՆ-ում ՀՀ դեսպան Նարեկ Մկրտչյանը մասնակցել և ելույթ է ունեցել Վիրջինիա/Կոլումբիական շրջանային արտահանման խորհրդի կողմից կազմակերպված կլոր սեղանի շուրջ, հաղորդում է ՀՀ դեսպանությունը։
Իր ելույթում դեսպանը ներկայացրել է ՀՀ-ի և ԱՄՆ-ի միջև երկկողմ հարաբերությունների օրակարգը, անդրադարձել տարբեր ոլորտներում համագործակցության հնարավորություններին և ներկայացրել Հայաստանի ներդրումային ներուժը։
Մկրտչյանը նաև կարճ քննարկում է ունեցել ԱՄՆ Փոքր բիզնեսի վարչության արտադրության և առևտրի գրասենյակի փոխտնօրեն Դեյվիդ Բուլսի հետ։
Վիրջինիա/Կոլումբիական շրջանային արտահանման խորհուրդը (VADC DEC) ճանաչված ոչ առևտրային կազմակերպություն է, որը կազմված է միջազգային առևտրի ճանաչված մասնագետներից, որոնք նշանակվել են ԱՄՆ առևտրի նախարարի կողմից։ Խորհրդի հիմնական առաքելությունն է անվճար օգնություն տրամադրել Վիրջինիայի և Վաշինգտոնի փոքր և միջին բիզնեսներին՝ միջազգային շուկաներ մուտք գործելու և արտահանումը մեծացնելու համար։
