ԱրմԻնֆո. ՀՀ բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանն ընդունել է Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Խալիլ Շիրգոլամիին։
Ինչպես հայտնում է նախարարության մամուլի ծառայությունը, հանդիպման ընթացքում քննարկվել են բարձր տեխնոլոգիաների ոլորտում համագործակցության զարգացման հեռանկարները։
Դավիթ Թադևոսյանն ընդգծել է այս ոլորտում երկկողմ համագործակցության ընդլայնման մեծ ներուժը՝ հույս հայտնելով, որ մոտ ապագայում այն կդառնա ավելի համապարփակ և արդյունավետ։
Դեսպան Խալիլ Շիրգոլամին ներկայացրել է Իրանի տեխնոլոգիական ներուժը՝ առանձնահատուկ ընդգծելով նանոտեխնոլոգիաների ոլորտում երկրի ձեռքբերումները և շեշտելով Իրանի առաջատար դիրքերը այս ոլորտում համաշխարհային մակարդակով։
Դեսպանը պատրաստակամություն է հայտնել իր լիազորությունների շրջանակում աջակցել բարձր տեխնոլոգիաների ոլորտում հայ-իրանական համագործակցության հետագա զարգացմանն ու խորացմանը՝ նպաստելով դրա դրական դինամիկայի պահպանմանն ու ամրապնդմանը։
Հանդիպման ընթացքում քննարկվել են բարձր տեխնոլոգիաների, արհեստական բանականության, թվային լուծումների, կապի և հեռահաղորդակցության, նանոտեխնոլոգիաների ոլորտներում երկկողմ համագործակցության ընդլայնման հնարավորությունները, ինչպես նաև այս ոլորտներում համատեղ ծրագրերի և նախաձեռնությունների իրականացման հեռանկարները։
Ընդգծվել է Հայաստանի և Իրանի տեխնոլոգիական ընկերությունների, ստարտափների և նորարարական կառույցների միջև կապերի ամրապնդման, փորձի փոխանակման և համատեղ նախաձեռնությունների զարգացման անհրաժեշտությունը։
Կողմերն անդրադարձել են նաև տեխնոլոգիական ոլորտում համագործակցության վերաբերյալ երկու երկրների համապատասխան կառույցների միջև փոխըմբռնման հուշագրի վավերացման կարևորությանը՝ ընդգծելով, որ դա կնպաստի հետագա համագործակցության հիմքերի ամրապնդմանը և համատեղ ծրագրերի իրականացման հնարավորությունների ընդլայնմանը։
