Արմինֆո. Հայաստանը ԵԱՏՄ-ին տալիս է ավելին, քան ստանում է, և պետք է ավելի մեծ բաժին ունենա միության ընդհանուր տնտեսական համակարգում։ Այդ մասին նոյեմբերի 5-ին ճեպազրույցում լրագրողներին հայտարարել է էկոնոմիկայի նախարար Գեւորգ Պապոյանը՝ պատասխանելով ԵԱՏՄ-ին Հայաստանի անդամակցության հնարավոր սահմանափակումների մասին հարցին։
"Հայաստանը չպետք է տա 450 մլն դոլար և ստանա 250 մլն դոլար, այլ արդարացի է, որ Հայաստանը պետք է ստանա 900 մլն դոլար։ Այլ կերպ ասած՝ մենք շատ ենք տալիս և քիչ ենք ստանում: Մենք արդեն շատ վատ վիճակում ենք, չպետք է 450 տայինք ու 250 ստանայինք, ուղղակի, պետք է ստանայինք 900՝ տալով 450", - ասել է Պապոյանը։
Նա նշել է, որ տարբեր ժամանակներում քննարկվել է միության ընդհանուր տնտեսական համակարգում Հայաստանի բաժնի ավելացման հարցը, և մյուս երկրները ևս բարձրացրել են նման հարցեր: Նախարարի խոսքով՝ հայկական կողմը ներկայումս նախապատրաստական աշխատանքներ է տանում ՝ բանակցություններն առավել բարենպաստ պայմաններում անցկացնելու և դրական արդյունքի հասնելու համար:
Հարցին, թե աաարդյոք ակնկալում է, որ Հայաստանի ներկայացրած փաստարկները կհանգեցնեն սահմանափակումների վերացման, Պապոյանը պատասխանել է, որ լավատես է: "Կարծում եմ, որ, առնվազն, մեկ երկիր կօգտվի վետոյի իր իրավունքից։ Մենք էլ պետք է սա քննարկենք, հասկանանք, ես դրա հետ կապված երբեք պատրանքներ չեմ ունեցել", - ասել է նախարարը, հավելելով, որ ավելի ուշ նոյեմբերի 9-ին հնարավոր ընթացակարգերի մասին մանրամասներ կներկայացնի։
Անդրադառնալով ԵՄ-ին Հայաստանի անդամակցության հեռանկարներին և ԵԱՏՄ անդամ երկրների կողմից հնարավոր արձագանքին՝ Պապոյանն ասել է, որ ցանկացած երկիր կարող է առնչություն ունենալ Հայաստանի որոշումների հետ, բայց պետք է հասկանալ ՝ արդյոք նա իրավունք ունի պահանջներ ներկայացնել: Նրա խոսքով ՝ Հայաստանը մնում է ԵԱՏՄ անդամ և շարունակելու է կատարել իր պարտավորությունները միության շրջանակներում այնքան ժամանակ, քանի դեռ անդամակցությունը ճիշտ է համարում: Պապոյանը նաև ընդգծել է, որ ԵՄ անդամակցության հայտ ներկայացնելու հնարավոր ժամկետների մասին վարչապետ Նիկոլ Փաշինյանի հայտարարությունները հասցեագրված են միջազգային հանրությանը և ուղղված չեն կոնկրետ որևէ երկրի:
Նշենք, որ 2025 թվականին Հայաստանը ԵԱՏՄ ներմուծման մաքսատուրքերի ընդհանուր բյուջե է փոխանցել մոտ 319 մլն դոլար, իսկ ետ ՝ հօգուտ Հայաստանի, բաշխվել է մոտ 175 մլն դոլար: Բացասական սալդոն կազմել է մոտ 144 մլն դոլար: 2024 թվականին երկիրն ընդհանուր բյուջե է փոխանցել 323 մլն դոլար, հետ ստացել 189 մլն դոլար (բացասական սալդոն կազմել է մոտ 135 մլն դոլար): ՀՀ վարչապետ Նիկոլ Փաշինյանի խոսքով ՝ այս ցուցանիշները ցույց են տալիս, որ երկրի մասնակցությունը միավորմանը կառուցվում է ընդհանուր պարտավորությունների կատարման, այլ ոչ թե միակողմանի ֆինանսական օգուտների վրա: Իրենց հերթին՝ Ռուսաստանի ԱԳՆ-ում նշել են, որ Հայաստանի մասնաբաժինը ԵԱՏՄ ընդհանուր բյուջեում կազմում է մոտ 1 տոկոս:
