Չորեքշաբթի, 18 Նոյեմբերի 2026 12:30
Ալեքսանդր Ավանեսով

Նախարար. հաջորդ տարվանից Հայաստանի հարկային օրենսգրքում փոփոխությունները կկատարվեն տարին մեկ անգամ

Նախարար. հաջորդ տարվանից Հայաստանի հարկային օրենսգրքում փոփոխությունները կկատարվեն տարին մեկ անգամ

ԱրմԻնֆո.  Հայաստանում ակտիվ հարկ վճարողների թվի աճ է արձանագրվում։ Այս մասին նոյեմբերի 17-ին ՀՀ Ազգային ժողովի ամբիոնից հայտարարել է ՀՀ ֆինանսների նախարար Վահե Հովհաննիսյանը՝ երկրի 2027 թվականի պետական բյուջեի նախագծի ներկայացման ընթացքում։

Նախարարի խոսքով՝ եթե 2021 թվականին նրանց թիվը կազմում էր շուրջ 107 հազար, ապա 2025 թվականին այդ ցուցանիշը գերազանցել է 148 հազարը։ 2026 թվականի 9 ամիսների տվյալներով՝ ակտիվ հարկ վճարողների թիվն արդեն հասել է 155 հազարի։ Իսկ դա, ինչպես նշել է Հովհաննիսյանը, նշանակում է տնտեսական գործունեության ավելի լայն շրջանակ և հարկային բազայի ընդլայնման հնարավորությունների ավելացում, ինչը տեղի է ունենում ստվերի կրճատման հաշվին։ Որքան այն քիչ է, շարունակել է նախարարը, այնքան բարձր են հավասար մրցակցության պայմանները։

Նախարարը նաև նշել է, որ հաջորդ տարվանից կներդրվի համակարգ, որն ուղղված է լինելու հարկային օրենսգրքում փոփոխություններ տարին մեկ անգամ կատարելու գործելակարգին, ինչը կհամապատասխանի միջազգային պրակտիկային և  թույլ կտա բարձրացնել բիզնեսի համար կանխատեսելիությունը։ Այս մոտեցումը ենթադրում է անհրաժեշտ ամբողջ տեղեկատվության հավաքագրում, դրա քննարկում և որոշման ընդունում տարին մեկ անգամ։

Նշենք, որ ներկայումս ԱԺ նիստերի գրեթե բոլոր օրակարգերում առկա են Հարկային օրենսգրքում փոփոխություններ կատարելու վերաբերյալ նախագծեր։ Բացառություն չի կազմի նաև խորհրդարանի ընթացիկ նիստի օրակարգը։

Հիշեցնենք, որ Հայաստանի 2027 թվականի պետական բյուջեի նախագիծը, որը կառավարության կողմից հաստատվել է 2026 թվականի հոկտեմբերի 1-ին և քննարկվել խորհրդարանական հանձնաժողովներում, նախատեսում է պետական գանձարանի եկամուտները հասցնել 3 տրլն 604 մլրդ դրամի, ինչը կազմում է ՀՆԱ-ի 26,6%-ը։ Դրանցից հարկային եկամուտները՝ 3 տրլն 463 մլրդ դրամ (ՀՆԱ-ի 25,4%)։ Ծախսերը նախատեսված են 4 տրլն 072 մլրդ դրամի մակարդակում, պետական բյուջեի դեֆիցիտը կկազմի 468,18 մլրդ դրամ, ինչը կազմում է ՀՆԱ-ի 3,4%-ը (համեմատության համար՝ 2026 թվականի բյուջեում դեֆիցիտը կազմում էր 537 մլրդ դրամ)։ Դեֆիցիտի ծածկումը նախատեսվում է ներքին (մոտ 187,5 մլրդ դրամ) և արտաքին աղբյուրների հաշվին։  ՀՆԱ-ի դեֆլյատորը սահմանվել է 3,1% մակարդակում։ Ուժային բլոկի ծախսերը կկազմեն 835 մլրդ դրամ, կապիտալ ծախսերը՝ 761 մլրդ դրամ։